VIDEO Italiami nunap sajunnerani ajunaartut eqqaaniaraat

Pingasunngormat unnuakkut nunap sajorujussuarnerata kingorna Italiamiut suli quarsaaqqapput. Nunarsuarmilu sumiiffinni assigiinngitsuni ilisarnaatit tusaamasat seqerfigalugit ajunaartut eqqaaniarneqarput.

New Yorkimi World Trade Centerip nutaap napasuliaa meterinik 124-nik portutigisoq Italiap erfalasuata qalipaataanik, qorsummik, qaqortumik aappalaartumillu seqerfigineqarpoq.

Aamma Brasiliami Rio de Janeiromi Jiisusimik napasuliarsuaq taamatut seqerfigalugu eqqaaniaasoqarpoq.

Nunap sajorujussuarneranit ullut marluk qaangiupput. Illoqarfimmi Amatricemi illorpassuit isasoorput ajunaartutullu nalunaarutigineqartut amerligaluttuinnarlutik.

Italiami upalungaarsimaniarnermut oqartussat nutaarsiassaqartitsivimmut Reutersimut oqaatigaat, nunap sajunnerani ajunaartut 267-iusut, 400-ngajaallu aqqunartiterlutik napparsimmavinni uninngasut.

AP/DIGITAL GLOBE/ RITZAU