Italiami naalakkersuisut Napolimi sakkutuuliinialerput
Italiami naalakkersuisut Italiap kujataani illoqarfimmut Napoli-mut sakkutuuliinissartik eqqarsaatigilerpaat, illoqarfimmi aaqqissuussaasumik pinerluttoqatigiinnut, mafianut, atatillugu toqutsinerit arlallit qanittukkut pereersullu. Isumannaatsuunissaq pillugu politiit 1000-it Romamit massakkuugallartoq Napoliliartinneqarput.
Napolimi inuit pingasut ippassaq toqutaapput, taamaalilluni tallimanngormamiit toqutsinerit arfineq-aappassaat ippassaq pivoq. Toqutsinerit tamarmik aaqqissuussaasumik pinerluttoqatigiinnut mafianut attuumassuteqarsorineqarput.
Italiami ministeriuneq Prodi isumaqarpoq Napoli-mut sakkutuuliinissaq pisariaqalersinnaasoq.
- Sakkutuut piffissami sivikitsumi eqqissisaajartuinnassanngillat, innuttaasulli isumannaatsuunissaat pillugu aalajangersimasumik suliaqassallutik, Prodi oqarpoq.
Napoli-mi Guvernørip kissaataa naapertorlugu politiit illoqarfimmi isumannaatsuunissamik suliaqartut massakkut 13.000-usut sapaatip-akunnerata tulliani 1000-inik ilaneqassapput.
Napoli millionimik ataatsimik innuttaqarpoq Italiallu piitsuunerpaaffiani inissisimalluni. Illoqarfiup innuttaasa sisamararterutaat, tassa ilaatigut inuusuttut affaat suliffissaaleqisuupput.
Illoqarfiup aaqqissuussaasumik mafianik taaneqartartunik pinerlunniartartoqarnini tusaamasaassutigaa.
Ukiut arlalialuit qaangiukkaangata aaqqissuussamik pinerlunniartartoqatigiit assigiinngitsut imminnut akersuutilertarput. Taamatullu akersuunneq ukiormanna inuit 70-it toqutaanerannik akeqarsimavoq.
Danskeq aviisiliortoq, Morten Beider, Italiami mafiat pillugit atuakkiorsimasoq, aamma Napoli-mi najugaqarsimavoq, illoqarfimmilu najugaqarluni ulorianaateqarnersoq aperineqarami akivoq,
Napoli-mi anissagaanni mianersortariaqartoq.
- Aningaasarpassuarnik nassartariaqanngilaq, tillinneqariaannaammata. Aamma inuit sianiitsut kisimik kuultinik ujamilerlutik anisinnaapput.
Beider oqaluttuarpoq, Napolimiitillutik sisamaallutik biilertillutik scooterinit arlalinnit unitsinneqarsimallutik, taskerlu biiliniittoq, silataaniit takusinnaasartik, biilit igalaavat aseroriarlugu tillinniat tigusimagaat.
Beider aamma oqarpoq, pinerlunniartarneq iliuuseqarfigineqassappat, inuusuttut suliffissaqalersinneqartariaqartut, massakkummi inuusuttut affaat suliffissaqartinnagit aaqqissuussaasumik pinerlunniartartunut mafianut ilanngunnissaq inuusuttunut ajornanngippallaaqimmat.
