Italiami inupiluit mafiat ittuat tigusaraat

Mafiat ittuat 80-inik ukiulik inuit allat 300-it ilanngullugit politiinit tigusarineqarput.

Tigusarinninnermi mafiap qanoq pissaaneqartigilersimanera paasineqarpoq.

- Tigusarineqartut 160-it Italiap kujataanit Calabriamit ungasissorujussuarmit tigusarineqarput. Mafiap Italiamut tamarmut siaruarsimanera inuarnerit, pinngitsaaliilluni akiliisitsisarnerit akiliillunilu peqquserlutsitsisarnerit uppernarsisippaat.

Italiap avannaani tigusarinninnerit pimmata immikkuullarippoq, tamaanimi aningaasat kaaviiaartinneqartut qiterilluinnarpaat, mafiallu tamaani immikkoortortaqarnera taamaalilluni uppernarsineqarpoq.

Siciliami Mafiamit Ndrangheta maanna pissaaneqarneruvoq, kokainimillu Europami niunernerit 80 %-iat taakkunannga ingerlanneqartoq immikkut ilisimasallit naatsorsuutigaat. Cosa Nostrap Siciliami pisortanik peqqarniitsumik sorsunnerani Ndrangheta nipaarluusimavoq.

Ndrangheta-mi ilaqutariit kisimik ilaasortanngorsinnaapput, taamaalilluni taakku ilisimaneqarpianngillat. Ullumili tigusarinninnerit Ndranghetap unitsinnissaanik kinguneqarunnanngitsut DR-imi tusagassiortup Morten Bayder-ip ilimagaa, tassami inuiaqatigiit aaqqissugaaneranni qullerpaat ilanngullugit mafia ilaasortaqarpoq.

Mafia piivinneqassappat Italiamiut annertuumik akiuiniartariaqarput, pinerlunnikkummi aningaasat isaatinneqartut annertuut taakkunannga pisuusarput.