IT: Kommunimi qarasaasiakkut virusi ajutoortitsisoq
Kommunimi sulisup mailikkut allagarsiani ippassaq ualikkut ammarsimavaa, mailip filitaa kakkiunneqarsimasoq sunaaffa viruseqarsimasoq - mailerlu ammarneqarmat virusi IT-eqarfimmut angussimalluni.
- Virusi qarasaasiani ingerlaartoq aatsaat unnuaq paasineqarpoq, tassa atortoq virusinik ilisarinnissinnaasoq aqqusaarneqareersorlu virusi paasineqarpoq, Kommuneqarfik Sermersuumi IT-mik akisussaasoq, Gert Jakobsen oqarpoq.
AAMMA ATUARUK IT-kkut ajutooqqaneq pissutigalugu isumaginnittoqarfimmit aningaasarsisoqarsinnaanngitsoq
Virusi paasineqareersorlu kommunimi qarasaasiani allagaatinik toqqortuiffiit tamarmik ullaassaq tallimanut qaminneqarput, tamatumalu kingorna toqqortuiffiit ataasiakkaarlugit misissorneqarput virusiiarneqareeraangamillu ammarneqartarlutik, Gert Jakobsen KMR-mut oqarpoq.
Socialimit pisartakkat eqqorneqartut
Virusimik eqquisoqartarnera naliginnaasoq oqaatigineqarpoq.
- Qaammammut marloriarluni pingasoriarluniluunniit taamaattoqartarpoq, pisortatut tamanut sullissisuuvugut, taamaattumik akulikitsumik virusinik qarasaasiatigut saassussisoqarsinnaasarpoq, Gert Jakobsen.
Maili virusitalik pisortaqarfiit ilaannit kommunimut nassiussaasimavoq siaruaassimallunilu. Pisumilu piaarisoqanngilaq.
IT-mik ajutoorneq aaqqissuteqarfigineqareeraluartoq socialimik pisartagallit suli utaqqisariaqassapput, Pisartakkanik tunniussisarneq aatsaat ataasinngorpat septembarip ulluisa 30-nni pisinnaasoq nalunaarutigineqarpoq.
Virusili suminngaanneersuusimanersoq IT-mik akisussaasup oqaatigiumanngilaa.