Isumasiuineq: Sverigemi amerlanerussuteqartut Nato-mut ilaasortaanissaq isumaqatigaat
Massakkut Natomut ilaasortaanissaq Sverigemi amerlanerussuteqartut isumaqatigaat, Npvus-ip isumasiuinerata takutippaa. Ilaasortaanissamuyt isumaqataaneq nukittorsarneqarpoq Finlnadip ministeriunerata Sanna Marin-ip Stockholmimut tikeraarnerata kingorna, tassanilu Sverigep Finalndillu Natomut ilaasortaanissaat oqaluseerineqarpoq.
Svenskit TV-at naapertorlugu sapaatip akunnerani kingullermi svenskit Natomut ilaasortaanissaannik qinersisartut 45 procentiinit tapersersorneqarpoq. Sisamanngornermi Novus-ip isumasiuinerini tapersersuineq siullermeerluni 50 procentit qaangerpaat.
Pingasunngornermi Demoskop-imit isumasiuinermi tapersuineq Aftonbladet naapertorlugu 57 procentiuvoq.
Finlandip ministeriunerata Sverigemut tikeraarnerata kingorna Novus-ip isumasiuinerini tapersersuineq malunnartumik annertusisimavoq. Misisissuinerup takutippaa svenskit 64 procentiitut amerlatigisut Finland Natomut ilaasortanngorniarluni qinnuteqarpat malinniaraat.
Novus naapertorlugu svenskit 24 procentiisa nunat killiit iligiiffiannut ilaasortaanissaq akerleraat. Siuliani isumasiuinermit annikilleriarneruvoq. Pingaartumik qinersisartut ministeriunerup Magdalena Anderssonip partiianik Socialdemokraterna-nik taasisartut Natomut ilaasortaaneq pillugu isummaminnik allannguisimapput.
– Taasisartuni socialdemokratiusunit Natomut ilaasortaanissamut tapersersuineq annertusisimanngilaq, kisianni akerliusut ikileriarsimapput,massakkullu nalornisut amerlisimallutik, Novus-imi pisortaaneq Torbjörn Sjöström oqarpoq.
Svenskit apersorneqartut affaat isumaqarput Natomut ilaasortaanerup Sverigep isumannaannera annertusitissagaa, 19 procentilli isumaqarlutik isumannaanneq allanngussanngitsoq. 16 procentit isumaqarput ilaasortaanerup Sverige annikinnerusumik isumannaallisissagaa.
Finlandip ministeriunera naapertorlugu Nato pillugu Finlandip aalajangernissaa sapaatip akunneri ikittunnguit iluanni aalajangerneqassasoq ilimanarpoq.
Masakkut Sverigemi isumannaannissaq pillugu politikkimik misissuisoqarpoq, 31. maj naammassereersimasussamik. Svenskit ministeriunerata siusinnerusukkut piareersinnaassasoq ilimasaarutigaa.
