Isumasioqatigiinnissaq isornartoqartippaat
Kommunit kattunnissaat sioqqullugu nunatsinni Meeqqerisutut Ilinniarsimasut Bornholm-imi isumasioqatigiinnissaat, Lone Birch-mit, nammineq Meeqqerisutut ilinniagalimmit isornartorsiorneqarpoq.
Meeraanitsialak.gl-mik piginnittup Bo Christensen-ip sulissutiginninneratigut Meeqqerisut Bornholmiliartussanngorput. Tamaani ukiut sisamat matuma siorna kommune ataasiinnanngortinneqarpoq ikaarsaarnermilu Ulluunerani Paaqqinnittarfiit ajornartorsiutitut nalaataat paasisassarsiorfigiumaneqarput.
-Bornholm Kalaallit Nunaallu assigiissuteqartupilussuupput taamaattumik taakku qanoq ingerlalersimanerat uagutsinnut paasissallugu iluaqutaaginnassaaq, taama oqarpoq Bo Christensen. Lone Birch-li Meeqqerisoq, Paamiut Atuarfiani atorfilik ima isumaqarpoq.
-Inuiaqatigiinni siumut ingerlaniarnitsinni allorialaassagutta kisianni tassa inuiaqatigiinnut allanut paasisassarsiorluta. Namminersulivinnissamut ingerlavugut nammineersinnaanerput akuuffigerusupparput aamma kommunit kattussuunnissannut innuttaasugut sanarfeqataarusuppugut. Uagut ulluinnarni atugarigatsigit piareersaaqataaffegerusuppagut taamaattumik politikerit kommunit kattunnissaannut innuttaasunut ammaassisariaqarput, taama oqarpoq Lone Birch.
Kommunit qulit oktoberip aallartilaarnerani Bornholmiliartitsissaapput. Peqataasussat ilagaat Kristian Broberg, Qeqertarsuup Kommuniani Kultureqarnermut, Meeqqanut Ilinniartitaanermullu immikkoortortaqarfimmi pisortaavoq, taanna oqarpoq soorunami nammineersinnaasugut.
-Soorunami pingaaruteqarpoq aamma uatsinnut qiviassalluta, kisianni ullumikkut sumiluunniit nunarsuarmioqatigiinnitsinni saneqqussinnaanngilarput misilittagaqarsimareersut paasiniaavigissallugit, tamanna ileqquuvoq pitsaasorpassuarnik kinguneqartartoq, taama illuatungiliivoq Kristian Broberg.
Pingaartinnerarpaa nammineq Qeqertarsuup Kommuniani Kultureqarnermi, Meeqqanut Atuartitaanemullu Immikkoortumi pisortaalluni allat misilittagaannik aamma paasisaqarnissi, taama oqarpoq Kristian Broberg.
Meeqqerisutut Ilinniagallit Peqatigiiffiata siulittaasuat Kaalina Skifte oqarpoq, namminneq pilersaarut ajoriffissaqartinnagu. Isumasioqatigiinneq Allinge-mi ingerlanneqassaaq.
