Isumasioqatigiinneq iluaqutissartaqarnerarpaat

Suliffeqarfiit Jyllandip avannarpasissuaneersut Kalaallillu Nunaanneersut 160-it Katuami ullumi isumasioqatigipput taaguuserlugu "Siunissami periarfissat pillugit suleqatigiinneq".

Maniitsumi suliffeqarfiutilik Søren Lyberth isumasioqatigiinnermut peqataavoq, suliffeqarfiillu taamatut isumasioqatigiissinneqarnerat attaveqaatinut iluaqutaasinnaanerat taassuma oqaatigaa:

- Aluminiumik aatsitsivimmik Maniitsup eqqaani pilersitsiniartoqarpoq, aatsitassanillu Maniitsup eqqaani piiaasoqalersinnaanera ilimagineqarsinnaavoq, taamaattumik namminersortutut pingaaruteqarpoq attaveqaatit iluarsartunnissaat. Attaveqaatit pitsaasuusariaqarput, taamaattumik isumasioqatigiinnermut peqataajartorpunga, Maniitsumi suliffeqarfiutilik Søren Lyberth oqarpoq. Taamatuttaaq Sisimiuni suliffeqarfiutilik Anette Lings oqarpoq.

Isumasioqatigiinnerup inuussutissarsiutitigut siuarsaanissamut iluaqutaasinnaanera taassuma tikkuarpaa:

- Suliffeqarfiit assigiinngitsut assigiinngitsorujussuarnillu suliallit isumasioqatigiinnermi peqataapput, ataatsimilli siunertaqarput, tassaavorlu Kalaallit Nunaanni Aalborgimilu inuussutissarsiornermik siuarsaanissaq. Tamanna pillugu saqqummiussisoqaqattaarpoq. Pissanganaqaaq, pissarsiaqarnaqalunilu, Anette Lings oqarpoq.

Aalborgip Kangerlussuullu akornanni attaveqalersinnaanissaq ilaatigut oqallisigineqarmat, takornariaqartitsisarnerup ineriartortinneqarsinnaanissaa taassuma aamma ujartorpaa, periarfissaasoralugulu.

Inuussutissarsiorneq pillugu isumasioqatigiissitsisarnerit allat eqqarsaatigalugit ullumi isumasioqatigiinneq sumut iluaqutaassanersoq aperaarput.

Suliffeqarfiit imminni pingaartinneqarnerunatik, suliffeqarfiit Jyllandip avannarpasinnerusortaaniittut Kalaallillu Nunaanniittut akornanni attaveqaqatigiittarnerat qanoq iliuuseqarnikkut pitsanngorsaavigineqarsinnaanersut isumasioqatigiinnermi matumani ujartorneqarnera taassuma tikkuarpaa, pingaaruteqarnerarlugulu.