Isumaqatiginninniarnernut sunniuteqassaaq
-Neriulluinnaqqissaarpunga aningaasarsiat ilorraap tungaanut aallarnissaannik kinguneqassasoq, tassami sanaartornermik suliaqartuni annerusumik akiliisoqartalissappat suliffinnut allanut tamanna sunniuteqassammat, Jess Gustav Berthelsen nassuiaavoq.
- Assersuutigalugu namminersortuni isumaqatigiissuterput ajoraluartumik pitsaanngitsutut naliliiffigineqartariaqarpoq. Namminersornerullutik oqartussani sulisut allaat maannakkut annerusumik aningaasarsiaqarput. Neriuutigaara taamatut aluminiuliorfissamik aallartitsinerup kingunerisaanik ilaasortatta aningaasarsiaqarnerulernissaq ujartussagaat. Allatut ajornartumik sulisut tigummiinnarniarneqassappata taava allat aningaasarsiatigut qaffaasariaqassapput. Taamaattumik neriuutigilluinnaqqissaarpara ilorraap tungaanut taamatut aluminiuliorfiliorneq kinguneqarumaartoq, Jess G. Berthelsen oqarpoq.
