Isumaqatiginninniarnerit ajalusoorput
Arfattassat ikilisinneqarnissaat Islandimit, Norgemit Japanimillu akerlerineqarpoq, tamannalu arfanniarnermut ataatsimiititaliarsuarmi isumaqatiginninniarnerit ajalusoornerannut pissutaavoq.
Allattoq Louise M. Kleemann
Nunat tunngavimmikkut isumaat imminnut ungasissorujussuusut, Anthony Liverpool ataatsimiititaliarsuarmi siulittaasup tullia Danmarks Radiomut oqarpoq.
Arferit annerit aqqaneq-marluk piniarneqarnissaannut inerteqqutip, ukiut 24-it matuma siorna atuutilersup, allanngortinneqarnissaa nunat 88-it arfanniarnermut ataatsimiititaliarsuarmi ilaasortat isumaqatiginninniutigisussaangaluarpaat. Tamatumunngalu atatillugu nunat arfanniat pingasut annerit Island, Norge Japanilu arfernik ikinnerusunik pisaqartalernissaat piumasarineqarluni.