Isumaqatigiissutit ikilisarneqarnissaat naleqqussarneqarneqarnissaallu Isumaqatigiissutinut Isumalioqatigiissitap suliassaraa

Martha Labansen Isumaqatigiissutinut Isumalioqatigiissitamut siulittaasutut naalakkersuisunit sisamanngormat toqqarneqarpoq.
- Isumaqatigiissutinut Isumalioqatigiissitaq Martha Labansen siulittaasoralugu misilittagalimmik, isumaqatiginninniallaqqissumik kikkullu tamarmik akuerisinnaasaannik isumaqatiginninniartartumik siulittaasortaarpoq, Vittus Qujaukitsoq, Aningaasaqarnermut Naalakkersuisoq, oqarpoq.
Allattoq Mads Lynge
maajip 10-at 2020 19:16

- Isumaqatigiissutinut Isumalioqatigiissitap isumaqatigiissutit amerlasuut ikilisarnissaannut, isumaqatigiissutinut aaqqissuussinermik, nunatta immikkuullarissumik pissusianut pisariaqartitaanullu tulluuttumik aaqqissuussinissamut siunertaqarpoq, Aningaasaqarnermut naalakkersuisoq Vittus Qujaukitsoq toqqaanermut atatillu oqarpoq.

Isumaqatigiissutillu sooq ikilisarneqartariaqarnersut Martha Labansenimut apeqqutigaarput, akivorlu:

- Allaffissornerujussuaq ullumikkut aqqqutigisarparput. Atorfinitsitsinerni kommunini Namminersorlutillu Oqartussani isumaqatigiissutit assigiinngitsorpassuit ujartuiffigineqartariaqartarput inuit ataasiakkaanut tunngatillugu suliassap ingerlanniarneqarnerani, taamaattumik suliassaq una pingaaruteqarpoq, Martha Labansen oqarpoq.

- Isumaqatigiissutinut aaqqissuussarput ilitsoqqussanit aamma pilersitsinikkullu inerneruvoq, Martha Labansen oqarpoq, isumaqatigiissuteqarfiup misissoqqissaarneqarnissaa suliniutigineqassasoq oqaatigalugu:

- Isumaqatigiinniartarnerni assigiinngitsuni ingammik isumaqatigiissutit Danmarkimi atuuttut tunngavigalugit nutaanik anguniagaqartoqartarpoq tikisitat amerlasuut nunatsinniinnerat pissutigalugit. Taamaattumik inuiaqatigiinni allani atuuttut assigiinngitsut eqqukkiartuaarneqarnikuupput, ilaatigullu aamma immaqa naleqqussarneqanngitsoorlutik atuutsiliinnarneqarnikuusut nunatsinni, Martha Labansen oqarpoq, nangillunilu:

- Isumaqatigiinniartarnerni assigiinngitsuni ingammik isumaqatigiissutit Danmarkimi atuuttut tunngavigalugit nutaanik anguniagaqartoqartarpoq tikisitat amerlasuut nunatsinniinnerat pissutigalugit. Taamaattumik inuiaqatigiinni allani atuuttut assigiinngitsut eqqukkiartuaarneqarnikuupput, ilaatigullu aamma immaqa naleqqussarneqanngitsoorlutik atuutsiliinnarneqarnikuusut nunatsinni, Martha Labansen oqarpoq.

Siulittaasutut qinigaaqqammersoq  socialrådgiveritut ilinniagaqarpoq 1999-2013-imilu kommunit kattuffigisimasaanni , KANUKOKA-mi pisortaasimalluni.

Isumaqatigiissutinut Isumalioqatigiissitap juunip aallartinnerani siullermeerluni ataatsimiinnissaa ilimagineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq