Kangerlussuup siunissaa: Isumaqatigiissut Nunanut allanut Sillimaniarnermullu ataatsimiititaliap apeqquserpaa

Kangerlussuup mittarfiata ataannarnissaanik kinguneqartussamik Naalakkersuisut Naalagaaffillu tunngaviusumik isumaqatigiissuteqartussanngornerat Nunanut allanut Sillimaniarnermullu ataatsimiititaliamit apeqquserneqarpoq. Isumaqatigiissut inuiaqatigiinnut qanoq sunniuteqassanersoq, ilaatigut apeqquserneqarluni.

Nunanut Allanut Sillimaniarnermullu Ataatsimiititaliamit nunatta illersorneqarnera eqqartorneqartillugu tunngaviusumik isumaqatigiissut naammagineqanngilaq. 

Kangerlussuaq mittarfittut atuutiinnarnissaanik Naalakkersuisut danskillu illersornissamut ministeriat Trine Bramsen isumaqatigiissummik pingasunngorpat atsioqatigiittussanngorput.

Tamatumunngalu atatillugu Nunanut allanut Sillimaniarnermullu ataatsimiititaliamit inuiaqatigiit aningaasaqarnikkut qanoq annertutigisumik eqqugaassanersut paaserusunneqarpoq:

- Paaseqqissaarusupparput taanna inuiaqatigiinnut qanoq isumaqarnersoq. Paaserusupparput inatsisartut tunngaviusumik isummerfigisimasaanut allannguuteqassanersoq. Taavalu aamma siunissami nunatta qanoq annertutigisumik sakkutooqarneq pillugu pituttorsimaffiginiarneraa ilanngullugu aamma paaserusupparput, Nunanut allanut Sillimaniarnermullu ataatsimiititaliami siulittaasoq Aleqa Hammond oqarpoq.

Isumaqatigiissutissaq nunatta karsianut aningaasartuutaassanersoq, imaluunniit Illersornissaqarfik aningaasaliisussanersoq, ataatsimiititaliap aamma paaserusuppaa.

Ataatsimiititaliap apeqqusernartoqartippaa

Aammali Illersornissaqarfiup Kangerlussuarmi mittarfimmik atuiinnarnissaanut suut isumaqatigiinniutigineqassanersut taamaallaat isumaqatigiissutigineqarmmat, ataatsimiititaliap apeqqusernartoqartillugu tusagassiuutinut tallimanngormat nalunaaruteqarpoq.

- Isumaqarpunga nunatta periarfissaq manna atortariaqaraa: Illersornissamik isumaqatigiissummik siullermeertumik isumaqatigiissuteqarluni. Sakkutooqarneq pillugu nunatsinni ullumikkut suut akuerineqarsinnaasumik atussanerivut. Periarfissatsialak neriuppunga Naalakkersuisut tigussagaat, Aleqa Hammond oqarpoq. 

Kalaallit qallunaallu politikerii tunngaviusumik isumaqatigiissuteqarpata, suleqatissiitat Illersornisaqarfimmeersunik taavalu kommuniniit ilaasortaqartut sulinissaannut tunngavissat inississapput.

- Soorunalimi nunarput nunanik allanik suleqateqassanngilaq innuttaasut pilliutaallutik. Siornatigut amerikamiut takusarsimavavut isumaqatigiissut uagut inuiaqatigiit kalaallit pilliutaasuusugut. Tamanna pinngitsoortikkumallugu maannakkut assoruussaagut qulakkeerniarlugu. Pisariaqartimmatigut aamma pisariaqartitatsinnut naapertuuttumik isumaqatigiittoqartariaqarpoq, Aleqa Hammond oqarpoq. 

Kangerlussuup ammaannarnissaanik tunngaviusumik isumaqatigiissut Naalakkersuisunit ministerimillu pingasunngorpat qulingiluanut atsiorneqalerpat danskit illersuisuata ministeriat Københavnimiissaaq, Naalakkersuisullu nunatsinni.