Isumaqatigiissut atorunnaartutut nalilerpaa

Royal Greenland aamma Aasiaat Kommuneat ukioq suleqatigiinnissamik isumaqatigiissuteqarnertik nalunaarutigaat, taamalu Aasianni tunisassiorfik ineriartortitsivittut atorneqassasoq.

Tassa nunatsinni aalisakkat tunisassiarineqarsinnaasut inerisarlugillu misilerarneqartassasut kiisalu qalerallit nutaat qerineqanngitsut timmisartukkut avammut tuniniarneqartalissasut kiisalu atuartut nerisassaqartinneqartarnissaat tunisassiorfimmiit isumagineqartassasoq kiisalu saattuanik tunisassiorneq ingerlaannassasoq isumaqatigiissutaasimasoq.

Aasiaat Kommuneatali isumaqatigiissut maanna atorunnaartutut nalilerpaa.

- Isumaqatigiissuteqanngilagut, atsiugaqannginnatta. Oqaasiinnakkummi isumaqatigiissutaammat pisinnaanavianngitsoq naatsorsuutigiinnassavaat, aamma aalisagassaqanngilavut fabrikkilu matoqqalluni, Enok Sandgreen oqarpoq.

Tassa avataani qaleralittassat 2.500 tonsit Royal Greenlandimut pisassiissutigineqarnissaat aallaavigalugu isumaqatigiissusiortoqarsimagaluarpoq.

Qalerallillu taakku allanut pisassiissutaasimammata isumaqatigiissutip atorunnaarsimanissaa naatsorsuutigalugu Enok Sandgreen erseqqissaavoq.

Royal Greenlandimiilli isumaqatigiissummik taamaatitsineq uniffigineqarnianngilaq.

Royal Greenlandip pisortaa Henrik Leth oqarpoq, Royal Greenlandip Aasianni tunisassiorfiutiminik piorsaanissani taamaatinngikkaa, ingerlatiinnarniaraalu.