Isumaqatigiissummik sivitsuipput
DBU-p GBU-llu isumaqatigiissutertik ukiunik marlunnik, 31.12.2009-p tungaanut atuuttussanngorlugu sivitsorpaat. Suleqatigiinneq pingaartumik sungiusaasunik dommerinillu ilinniartitsisarnermut tunngassuteqassaaq.
Nunatsinni sungiusaasut dommerillu pikkorissut pigineqalersimapput. Illuatungaatigut aamma DBU-mit pikkorissaajartortut ilitsersuisunik sungiusaanerminni atugassaminnik iluaqutissarsisartut, kattuffiit ataatsimut nalunaarutigaat.
DBU-p Danmarkimi pikkorissaanerinut Nunatsinneersut peqataasassapput, soorlu Europami arsaattartut kattufissuata UEFA-p isikkamik arsaannermut sungiusaasussanik B-trænerissanik pikkorissaanerani kalaallit aappaagumiit 2008-mi siullermeerlutik peqataasalissapput. A-trænerinngorniarnissamut kingusinnerusukkut aamma periarfissaqarumaarput.
Nunatsinni peqatigiiffinni arsaannermik sungiusaasut aqutsisullu Kalaallit Nunaanni Timersoqatigiit Kattuffiat peqatigalugu ilinniartinneqartarnissaat aamma isumaqatigiissutigineqarpoq.
GBU-p siulittaasua Lars Lundblad DBU-llu ilinniartitsinermut pisortaa Poul Gilling oqarput, ukiuni marlunni kingullerni suleqatigiinnertik ajunngilluinnarmat nangikkusukkitsik.