Isumaqatigiissitsiniartussamik pissarsinialerput
Isumaqatigiissitsiniartussaq Nunatta eqqartuussisuunerata, Søren Søndergård Hansenip toqqartussaavaa:
- Isumaqatigiissitsiniartussamik nassaartoqarpat, taassumallu suliai aallarteriarpata, taava suliartorallarsinnaanerput illuatungeriilluta isumaqatigiissutigaarput, Attaveqaammi siulittaasoq Jonathan N. K. Petersen oqarpoq.
Isumaqatigiissitsiniartussallu suliai angusaqarfiussanngikkaluarpata, Attaveqaammi ilaasortat suliumajunnaarnertik nangeqqissagaat, taassuma oqaatigaa, Attaveqaammili ilaasortat qaqugu sulileqqissinnaassanersut suli oqaatigisinnaanngikallarnerarpaa.
Upalungaarsimanissaq pillugu isumaqatigiissutip suliumajunnarnerup nalaani atorunnaarsinneqarnissaa, Telemi teknikerit kattuffianni ilaasortat sapaatip-akunnerata siuliani sioorasaarutigaat.
Isumaqatigiissut suliumajunnaarnerup nalaani atorunnaarsinneqassappat inuiaqatigiinnut kingunipiloqarsinnaasoq, TELE Greenlandimit taamanikkut oqaatigineqarpoq.
Tamanna eqqarsaatigalugu akisussaaffimmik qimarratiginninerua upalungaarsimanissaq pillugu isumaqatigiissut atorunnaarsinneqarpat?
- Taamatut taaneqarsinnaanersoq naluara, kisianni tassa isumaqatigiinniarnerni angusaqarusulluta taama oqariartuuteqarsimavugut, isumaqatigiittoqarsinnaasimananili. Tamanna aallaavigalugu isumaqatigiissitsiniartussamik siunniussaqarpugut, teknikerit kattuffianni Attaveqaammi siulittaasoq Jonathan N. K. Petersen oqarpoq.