Naak Kim Kielsen Siumumi siulittaasuujunnaareeraluarluni nunatsinni atuuffinni qaffasinnerpaami Naalakkersuisunut siulittaasutut suli issiavoq. Maannakkutullu isikkoqartillugu taamaaginnassaq.

Erik Jensenip atuuffimmiilernissaminik ilungersuuteqarnera maannamut kinguneqanngilaq.

Taassuma naalakkersuisoqataasullu partiivinut Demokraatinut Nunatta Qitornaannullu isumaqatigiinniarneri maanna unittut Sisimiunullu angerlaqqittoq aviisip Sermitsiap allaaseraa.

AAMMA ATUARUK Siumut Naalakkersuisullu: Erik Jensen suli oqaaseqarumanngitsoq

Isumaqatigiinniarnermi pingaarutilimmik nutaarsiassaqanngilagut, Inatsisartulli ukiuunerani ataatsimiinnermut atatillugu katersuuteqqippata nangittariaqakkatsinnik ataatsimiilluarsimagut oqaatigisinnaavara, taanna aviisimut oqarpoq.

Taamaalilluni isumaqatigiinniarnerit aamma nanginneqanngiinnarsinnaasut aamma oqaatigaa.

Kim Kielsenip isumaqatigiinniarnerit namminerlu isummani oqaaseqarfigiumanikuunngilai. Taannali siulittaasutut atuuffimmit tunuarusunngitsut takussutissaqarnikuuvoq.

Isumaqatigiinniartoqaqqissanersoq Inatsisartut februaarip ulluisa 16-ianni aallarteqqippata paasinarsiumaarpoq.