Isumannaallisaaneq qulakkeerneqartinnagu uuliasiortoqassanngilaq
Uuliasiorluni misileraalluni qillerinernut atatillugu isumannaallisaanissap sapaatit akunnerata siuliani oqallisigineqarnerannut atatillugu, naalakkersuisup naqissuserpaa uuliasiorfiit upalungaarsimaniarnermut pilersaarusiornissaq kiisalu aningaasatigut qularnaveeqqusiinissaq pisussaaffigigaat.
Uuliasioqatigiiffiit tassunga atatillugu namminersorlutik oqartussat ingerlatseqatigiiffiannut Greenland Oil Spill Responsemut (GOSR) isumaqatigiissuteqarnissaq pisussaaffigivaat, taanna atortorissaaruteqarput Kangerlussuarmi inissisimasunik. Uuliakoortoqassagaluarpat atortorissaarutit taakku sukkasuumik ornigutsinneqarsinnaapput, Lonni Bogø Wilms Greenland Oil Spill Responsemeersoq oqarpoq.
-Maannakkorpiaq atortorissaaruteqartitsinissaq kisiat neqeroorutigaarput, suliffeqarfilli suli sanarfivarput, siunissamilu aamma sulisunik neqerooruteqarsinnaalertussaassalluta, Lonni Bogø Wilms oqarpoq.
GOSR-ip atortorissaarutai Cairn Energyp 2001-mi misileraalluni qillerinerata naammassinerini pigineqalerput. Maannakkorpiaq nunatta imartaani misileraalluni qillerisoqanngilaq. Akuersissummillu tunniussisoqannginnerani uuliasiorfiit aamma uuliasiorlunilu qillerinermi upalungaarsimaniarnermik immikkut ilisimasallit nunanit tamalaaneersut isumaqatigiissuteqarfigissavaat.
Upalungaarsimaniarnermi aamma qillerivinni atortorissaarutit Kangerlussuarmilu atortorissaarutit ilaatinneqarput. Annertuumik uuliakoortoqartillugu nunanit allanit atortorissaarutinik aamma tikisitsisoqarsinnaavoq.
