Isumaliutissiissutip eqikkarnera paasiuminaappoq
"Imaami atuarlugu ilisimatusarnermut sulialinnut naleqqunneruvoq!" taama naliliivoq nunatsinni Tusagassiornermik ilinniarfimmi pisortaq Naja Paulsen:
-Atuarlugu malunnarpoq eqikkaaneq pineqartoq inunnut ilisimatusarnermut sulialinnut naatsorsuussaasoq, isumaqaraannili taanna aqqutigalugu oqariartuut innuttaasunut naliginnaasunut apuutissasoq, taava eqqarsaqqittariaqarsorinarpoq. Oqartarnerattut Sakæusikkut Benialu eqqarsaatigissagaanni taakku paasinartinnerussavaat oqariartuutit naatsukullaat erseqqissut, Naja Paulsen naliliivoq, nangillunilu:
-Inuit atuarusulluinnartut soorunami atuassavaat, innuttaasulli naliginnaat eqqarsaatigissagaanni oqimaappallaarsorinarpoq. Allatut immaqa atuaruminarsarlugu assitalersorlugu soqutiginarsarneqarsinnaagaluarpoq eqikkarneraluunniit CD-nngorlugu tusarnaarneqarsinnaasunngorlugu aamma suliarineqarsinnaangaluarpoq, Naja Paulsen oqarpoq nangillunilu:
-Paasinnilluarusuttut paasisaqartarput, uanili tamanna ajornakusuussangatippara, atuaruminartuusariaqarpormi takupallanneqarsinnaasoq naatsunik oqaasertalik, assiliartalik paasissutissanillu allanik innersuussisoq paasiuminartorlu, taama Tusagassiornermik ilinniarfiup pisortaa Naja Paulsen naliliinermi oqarpoq. Atuagaaraq paasitsiniut kalaallisut qallunaatullu allataq katillugu 30-t missaanni quppernilik, 24.000-nngorlugu naqinneqartoq, namminersorneq pillugu novembarip 25-ani innuttaasunik taasititsinissamut paasititsiniaanermut atorneqarpoq. Paasititsiniutit allat soorlu namminersorneq pillugu inatsisissamut siunnersuut inoqutigiinnut agguaanneqartussaavortaaq,