Isumalioqatigissitaliami ilaasortaaginnarnissaat apeqquserneqartoq
Christian Mejdahl aamma Frank Jensen namminersorneq pillugu isumalioqatigiissitami ingerlaqqittariaqanngillat. Tassa Dansk Folkepartip tamanna Danmarkimi naalakkersuisunut innersuussutigaa. Tamatumunnga tunngavilersuutigaat, Christian Mejdahl, folketingimut qinersinerup tungaanut folketingimut siulittaasuusoq aamma socialdemokratineersoq Frank Jensen maanna folketingimut ilaasortaajunnaareermata. Taakkumi marluullutik qinigassanngorteqqinngillat.
Aviisi ullormut saqqummersartoq Jyllands-Posten naapertorlugu Dansk Folkepartimi folketingimi ilaasortat siulittaasuata Kristian Thulesen Dahl-ip naalakkersuisunngortitsiniarneq pillugu ministeriunermik oqaloqateqarnermini oqaatigisimavaa, folketingimi ilaasortaasimasut taakkua marluk namminersorneq pillugu isumalioqatigiissitami ingerlaqqissinnaanissaat ajornakusuussasoq.
- Danmarkimi naalakkersuisut isumaqatigiinniarnernik pingaarutilinnik nammineerlutik ingerlatsinissaat kissaatigineruarput. Aamma pitsaassagaluaqaaq namminersorneq pillugu isumalioqatigiissitami ilaasortat folketingip ataatsimiittarfiani oqalliseqatigineqarsinnaappata, Kristian Thulesen Dahl Jyllands-Postenimut oqarpoq.