Isumalioqatigiissitami ilaasortat isumaqatigiissutissarsipput
Namminersorneq pillugu Isumalioqatigiissitap Aningaasarsiorneq Inuutissarsiutinillu siuarsaanissaq pillugu ataatsimiititaliaa naggataamik ullumi ataatsimiippoq. Ataatsimiinnermi aatsitassarsiornikkut isertinneqartalerumaartussat qanoq agguataarneqassanersut isumaqatigiissutigineqarpoq.
Allattoq Louise M. Kleemann
marsip 12-at 2008 10:35
Ataatsimiititaliami ilaasortaq Kuupik Kleist suliap inernera pillugu ima oqarpoq:
- Suleqatigiissitami isumaqatigiinniarneq sakkortusimaqaaq, ilaatigut isumaqatigiinngissutivut annertuallaaleraangata unittoortarlutalu avissaartortarpugut. Taamaattoq siunissami ukiorpassuarni atuuttussamik isumaqatigiissusiorpugut. Aammattaaq isumaqatigiissut meeqqatta taakkulu meeraasa inuunerannut akuujumaartussatut naatsorsuutigineqarsinnaavoq. Minnerunngitsumik nunatta naalakkersuinikkut aningaasarsiornikkullu ineriartorneranut ukiorpaalussuarni sunniuteqartussaavoq.
Apriilip ingerlanerani isumalioqatigiissitaq tamakkiisoq naammassineqassaaq, tamatumalu kingorna naalakkersuisut siulittaasuannut statsministerimullu tunniunneqassalluni.
