Isumalioqatigiissitami ilaasortat: Dansk Folkeparti kisimiippoq
-Folketingimut qinersisoqannginnerani isumaqatigiissut naammassivarput, atsioqatigiinnissarlu kisiat amigaatigalutigu, atasioqatigeeruttalu innuttaasunut saqqummiuttussaagaluarparput.
Taavali Folketingimut qinersivugut, taamaammallu Dansk Folkepartiip akerliujuarnermi nutarsarnissaa periarfissaqarfigisimavaat, danskit suleqatigisavut kajumissaaginnarusuppakka, isumaqatigiissut suliarineqareersoq, Kalaallit Nunaata Danmarkillu akornanni isumaqatigiissutaasoq ataqqinartoq, tigummiinnaqqullugu, Per Berthelsen oqarpoq.
Kristian Thulesen Dahl naapertorlugu isumaqatigiissut pillugu Dansk Folkeparti Danmarkimi innuttaasunik sunniiniarniarpoq, iluatsitsinissaalli Per Berthelsenip qularaa:
-Maannamut Danmarkimi inuinnaat akornanni paasiniaatsiarneq immaqa ukiup affaata matuma siorna takunikuusara tassaavoq Københavnimi Strøgimi pisuinnaat akornanni paasiniaaneq, TV Aviisip ingerlataa, tassani tassa misissuitsiarnerni paasisat ukuupput aperineqartut hornorujuugaangata 70-it oqartarput, pisuussutit uumaatsut Kalaallit Nunaata oqartussaaffigalugillu pigissagai, Per Berthelsen oqarpoq.
Kuupik Kleist aamma isumaqarpoq, isumaqatigiissut Dansk Folkepartiip unitsissinnaanngikkaa.
-Dansk Folkeparti isumalioqatigiissitaliami ikinnerussuteqarpoq, isumaliutissiissutillu qanoq isikkoqarnissaa 99 procentinit isumaqatigineqarpoq. Maanna naammassisariaqalerparput, taamaalioreeruttalu oqallikkumaarpugut.
Dansk Folkeparti tusagassiutitigut sammineqangaatsiarpoq, uangalu maannamiit akuliukkusukkunnaarpunga, Kuupik Kleist oqarpoq.
Namminersorneq pillugu Isumalioqatigiissitami ilaasortaq, Frank Jensen, aamma isumaqarpoq, Dansk Folkeparti kisimiittoq.
-Ukiuni kingullerni malunnarpoq, Dansk Folkeparti Namminersorneq pillugu Isumalioqatigiissitami, aatsitassat pillugit pitsaanerpaamik aaqqiiniartuni, partiit avataanniittoq, Frank Jensen nutaarsiassaqartitsivimmut Ritzauimut oqarpoq.
