Isumakkeerinninnermik tunisinissamik siunnersuut akerlilerneqarpoq

Kalaallit Nunaanni eqqartuussaasimasut pineqaatissinneqarsimasunut inissiisarfinnut qaammatini arfinilinni, sivikinnerusumilluunniit, inissitassat inissinnagit "isumakkeerinninnermik" tunineqartarnissaannik Danmarkimi inatsisinik atortitsinermut ministerip, Lars Barfoedip, siunnersuutaanut Atassummi siulittaasumut tullersortaasimasumit, Steen Lyngemit, isorineqarpoq.
Allattoq Carla Davidsen
maajip 12-at 2011 08:30

Danmarkimi naalagaaffiup aningaasanik sipaarniarnera nunatsinni eqqartuussiveqarfiit aalajangiiniartarnerinut tuppoq.

Lars Barfoedip siunnersuutaanut tunngaviusoq tassaavoq, pineqaatissinneqarsimasunut inissiisarfinnut isernissamut utaqqinartorujussuummat, ukiullu aappaa qiteqqullugu utaqqisimasut "isumakkeerinninnermik" taaneqartumik tunineqarsinnaasut.

Taamali isumaliorneq Atassummeersup Steen Lyngep "aningaasanik eqqarsarnertut" taavaa.

Steen Lynge tassa isumaqarpoq, pineqaatissinneqarsimasunut inissiisarfinni naammattunik inissaqarnissaq eqqarsaatigalugu Danmarkip aningaasaliinikippallaarsimanera Lars Barfoedip ersersikkaa.

Siunnersuut kalaallit oqartussaasut akuerissappassuk, eqqartuussiveqarfinni aalajangiiniartarneq innarlerneqassaaq, pineqaatissinneqarsimasummi "isumakkeerinninnermik" tunineqartassappata pinerlussimasup eqqunngitsuliorfigitittumit pingaarnerutinneqarnera eqqarsaataalersinnaammat, Steen Lynge isumaqarpoq.

Taamaammat Naalakkersuisut kaammattorpai Danmarkimi inatsisinut atortitsinermut ministerip, Lars Barfoedip, siunnersuutaa itigarteqqullugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq