Isumakkeerfigeqatigiinnissaq pillugu ataatsimiitialiorniarnermi Danmark akuunngilaq
![Aleqa Hammond](/sites/default/files/styles/image_934x467/public/article_images/aleqa_og_thorning.jpg?itok=M6e62trh)
- Isumakkeerfigeqatigiinnissaq uagut pisariaqartinngilarput, kalaallilli tamanna pingaartillugulu pisariaqartimmassuk tamanna ataqqilluinnarpara. Taamaammat oqallinneq qanoq ingerlassanersoq malinnaavigilluinnassavarput, naalagaaffeqatigiit ataatsimeereerlutik ministeriuneq tusagassiortunik katersuutsitsimmat taama oqarpoq.
Qallunaalli suleqataarusussinnaassappat?
- Isumaqanngilanga Danmark suleqataasariaqartoq. Unali naqissuserusuppara: Kalaallit tamanna qaqilerusuppassuk tusaatissatut tigussavarput.
Aamma Danmarkip Kalaallit Nunaatalu akunnerinnaani isumakkeerfigeqatigiinnissaq suliniutigineqassanngitsoq Aleqa Hammondip naqissuserpaa, Kalaallillu namminneq akunnerminni oqaluttuarisaaneranni pisimasut isumakkeerfigeqatigiinnermik imaqassasoq unnerlugu:
- Isumakkeerfigeqatigiinnissaq uagut kalaaliusugut akunnitsinni pisariaqartipparput. Naalakkersuisunimi siulittaasoqatinnut tamanna nittarsaappara, imaanngimmammi qallunaat kalaallillu akunnerminni isumakkeerfigeqatigiinnissaat kisimi pisariaqartoq. Inuiaqatigiippassuimmi allat nunatsinniittarsimapput uagullu inooriaatsitsinnut immitsinnullu paasinnittaatsitsinnut ulloq manna tikillugu sunniuteqarsimaqalutik, Aleqa Hammond oqarpoq.
- Oqallinnissarli pingaaruteqaqaaq, Namminersulersimanerpummi illuatungaatigullu Danmarkimut atassuteqarnerput iluatsilluassappat tamanna pisariaqarpoq. Taamaammat tamanna siuttuuffigerusuppara, oqallilluartoqarnissaa, isummanillu nikittoqarnissaa qularinngilara, politikkikkuinnaanngitsoq aammali innuttaasut naliginnaasut akornanni, Aleqa Hammond oqarpoq.