Meeqqaanut inuusuttunullu naalakkersuisoq Aqqaluaq B. Egede (IA), ulloq unnuarlu najugaqarfinnut inissiisarnermut atatillugu assut ajornartorsiuteqarnerup ilorraap tungaanut saatsinnissaanut naalakkersuisoqatigiit saqqummiunniagaannut tunngaasumik ataasinngormat ilisarititsivoq.

Suleqatigiissitat aamma misissuinerit tassaapput ajornartorsiutit qaangerneqassappata naalakkersuisoqarfiup maanna siunissamilu sakkuginiagai.

Naalakkersuisunit peqatigitillugu oqariartuutigineqarpoq, nunatsinniittut tamarmik suleqataasariaqartut aamma akisussaaffimmik tiguseqataasariaqartut ajornartorsiutit qaangiutserlugit.

Naalakkersuisut nalunaaruteqarneranni Martha Lund Olsen najuuppoq. Taanna isumaginninnermut siunnersortit nunatsinni peqatigiiffianni NIISIP-mi siulittaasuuvoq. Taakkuupput aamma ajornartorsiutinik qaangiiniarnermi aaqqissutissanik siunnersuuteqarsinnaasut.

Tusagassiorfinnik katersortitsinerup kingorna naalakkersuisoq apeqquteqarfigaa, sooq NIISIP suliamut atatillugu peqataatinneqannginnersoq. Aamma apeqqutigaa sooq siunnersuuteqartussatut aperineqarsimannginnerlutik. Pingaartumik naalakkersuisup suleqatigiinnissamik oqariartuuteqarnera eqqarsaatigalugu.

- Apeqquteqarpunga, pissutigalugu aasarli neriorsorneqaratta, suliamut suleqatigiissitanullu peqataatinneqassalluta. Sulimi ilimagaarput, KNR-mut kingorna oqarpoq.

- Neriukkaluaratta ilimagalugulu suleqatigiissitami pilersinneqartussami ilaassalluta, Martha Lund Olsen oqarpoq. 

Isumaginninnermut siunnersortit taperserneqanngitsut

Isumaginninnermut siunnersortit kommunini siunnersortitut sulisut suliassanik ulakkaavittarnerat tamanit nalunnginneqarpoq. Aningaasarsiaasa qaffanneqarnissaat, pikkorissarnissaat aniatitsivissaminnillu oqaloqateqartarnissaat suliaannut atatillugu pinngitsoornani iluaqutissaattut atuutilernissaat siornatigut taaneqartareerpoq. 

Tusagassiorfinnilli marlunngormat katersortitsinermi, kommunini inunnik isumaginnermut siunnersortit aningaasaliiffigineqarnerunissaat ilimanarpallaanngitsutut paasisariaqarpoq.

Naalli Martha Lund Olsenip kissaatigisammi ilaat piviusunngortinneqarnissaat kissaatigigaluarlugu inissiisarnermut ajornartorsiutaasunik aaqqiissutissarsiornissamut ilaasortanilu kivitseqataanissamut piareersimapput:

- Ilaasortagut ulluinnarni suligaangamik meeqqat uku pineqartut pillugit sulisarput. Taamaammat tapersiisinnaanissarput neriuutigaara, taanna oqarpoq.

Suleqatigiinnermik annertunerusumut piareersareersimasoq

Aqqaluaq B. Egede meeqqanut inuusuttunullu aasaq naalakkersuisunngorami peqatigiiffiit attuumassuteqartut tamarmik isumagininnermi ajornartorsiutaasunik aaqqiissuteqarnissaq pillugu oqaloqatiginiarlugit aamma neriorsuivoq:

- Politikkikkut oqallisissaavoq. Taamaammat naalakkersuisutut suliap ingerlannissaani isumaginninnermi siunnersortit peqatigiiffiat,  MIO, Tilioq aamma kommunit tamaasa oqaloqatigerusuppakka, ajornartorsiutip taassuma qanoq aaqqinneqarnissaanik atatsimoorluta suliaqarsinnaanersugut paasiniarlugu, Aqqaluaq B. Egede KNR-imut juunip 15-iani - tassa meeqqanut inuusuttunullu naalakkersuisunngornermi kingorna ullut qulit qaangiuttut oqarpoq.

Isumaginninnermilu siunnersortit suliamut ilanngutitinneqarsimannginnerat Martha Lund Olsenip nikalluutiginngilaa.

Naak qaaqquneqarsimannginnertik pakatsissutigigaluarlugu allagarsinissaa ammavoq, naalakkersuisullu NIISIP suleqatigerusukkuniuk ataatsimeeqateqarnissamut piareersimalluni, naalakkersuisup tamanna aasa sapaatillu akunnerani siusinnerusukkut aamma oqaatigaa:

- Kamaatigineqanngilaq. Qaaqquneqarutta taava takkutissaagut, taanna oqarpoq.