Isumaginninnermut ministeri immikkoortitsisimannginnerarpoq
Kalaallit meeqqat 22-t 1951-imi pinngitsaaliissummik nuutitaasunik suliassaq misissuiffigiumaneqanngippat, sooq isumaginninnermut ministereqarfiup 1950-ikkunni qallunaat meeqqat børnehjemminiittut atugarisimasaasa misissuiffigineqarnissaannut 1 mio. koruunit aningaasaliissutigineqarsimanersut, apeqqumminut Folketingimut ilaasortaq Doris Jakobsen ullumi akissutisivoq.
Isumaginninnermut ministerimut allakkatigut apeqquteqaammini Doris Jakobsen aperaaq "politikkikkut" "sumillu kingoqqisuunermut" danskit naalakkersuisuisa siullertut taaneqartutut taamaallaat misissuiniarnerminni suut tunngavilersuutigineraat.
Isumaginninnermut ministerip Karen Ellemann akissummini allappoq Svendborgip katersugaasivia ukiuni 1945-miit 1976-imut meeqqat børnehjemminiissimasut atugaasa misissuiffigineqarnissaannut aningaasanik qinnuteqarsimasoq. Misissuinermi børnhjemmini 30-ni pissutsit qulaajarneqassapput, ilaatigut nukappiaqqat angerlarsimaffianni Godhavnimi, meeqqat nakuuserfigineqartarnerannut nakorsaatinillu misiligaanernut atorneqartarsimanerannut pasillerneqartumi.
Isumaginninnermut ministerip Karen Ellemannip qinnuteqaatip taassuma akuerineqarsimaneranut politikki sumillu kingoqqisuuneq tunngavilersuutigineqarnerat pillugu oqarneq tunuartippaa.
Kalaallit meerartaat eqqarsaatigalugit ministeriunerup siornatigut akissutigisimasaa innersuuppa, taassumami suliassaq pisimasutut ajuusaarnartutut oqaatigimmagu, aammattaarli suliassatut oqaluttuarisaanitsinni kapitalitut naammassineqarsimasunut ilaasutut, soorlu ilaatigut Tine Bryldip atuakkiaani "Ajunnginnerpaamik isumaqarluni"-mi allaaserineqartutut.
"Kisiannili", Karen Ellemann allappoq, "danskit naalakkersuisui misissuinissamut allat aallartissallugu kissaatigisaannut akornusersuisinnaanatilluunniit akornusersuerusunngillat".
Naalakkersuisut siulittaasuat Kuupik Kleist ministeriunerlu Lars Løkke Rasmussen septembarimi isumaqatigiipput, kalaallit meeqqat 22-t pillugit suliassami qanoq iliortoqassanersoq pillugu Naalakkersuisut siunnersuummik saqqummiussissasut, aammalu danskit naalagaaffiat ikiuukkumalluni piareersimasoq.