Isumaginninnermi aqutsisoqarfik Ivaararlu angajoqqaat piumasaqaataannut arfineq-marlunnut maanna akissuteqartut

Arnaq 23-nik ukiulik, annertuumik innarluutilik naartusimasoq ilisimaneqarani septembarimi ernivoq. Arnaq Qaqortumi innarluutillit inaanni Ivaaqqami najugaqartuuvoq, taamalu pisoqarnerata kingorna angajoqqaaqatigiit Ivaaqqamiittuutillik meeqqanik inuusuttunillu paaqqutarinnimmi atugassarititaasut pitsaanerulernissaannut arfineq-marlunnik piumasaqaateqarput.

Isumaginninnermut aqutsisoqarfik imaluunniit Ivaaraq suliamut atatillugu oqaaseqarusussimanngillat, taakkuli KNR-imut akissuteqarlutik allapput, taamaalillutik Isumaginninnermut Aqutsisoqarfik aamma Ivaaqqami forstanderi, Sussi Larsen angajoqqaat piumasaqataannut arfineq-marlunnut akissuteqarput.

Piumasaqaatit arfineq marluk taakkununnga akissutit aaku:

1) Ivaaraq angerlarsimaffiuvoq angisooq

Perorsaasutut ilinniarsimasut Qaqortumi naammanngillat, pitsaanerussaaq Ivaaraq immikkoortortaqarfilersorlugu sineriammut aggulukkaanni.

Isumaginninnermi aqutsisoqarfik: Periarfissaasinnaavoq misissorneqarsinnaallunilu, kisianni innarluutilinnut neqeroorutit annikitsut amerlatigullu sumiiffissaat sulisussaallu ajornakusuussapput. Tamatuma saniatigut najugaqartut Ivaaqqami najugaqarnerminnik sungiussisisimasut toqqissisimasullu nuunnissaat naleqqutinngilaq.

Ivaaraq: Nunarput tamakkerlugu perorsaasut amigaataapput, immikkullu ilisimasat amigaataatillugit innarluutilinnik paaqqutarinniffinni amigaateqarneq nalinginnaasumik annerusarpoq.

2) Najukkami sinaakkutit

2. Najukkami avatagiisit sinaakkutillu najugaqartunut pitsaasuusariaqarput. Ivaaraq angerlarsimaffippalaanngilaq, pitsanngorsarneqartariaqarpoq. Soorlu kiassanermut tunngasunik ajornartorsiuteqarpoq.

Isumaginninnermi aqutsisoqarfik: Ivaaraq najugaqartunut ataasiakkaanut tamanut annertuumik innarluuteqartunut kaasuartakkaniittunullu naleqqussagaavoq. Taakku natermi paarngullutillu kaavissinnaaneq aalanissaannut periarfissatuaavoq.

Taakku aalasinnaanissaannut akornutaasoqassanngilaq, taamaammat Ivaaqqap natersuarnik, nalaasaarfinnik, ilitsivinnik, nerrivinnik allanillu atortulersorlugu angerlarsimaffippalaartilernissaa ajornakusoorpoq. Kisianni soorunami iigartai angerlarsimaffippalaartitsilernisssamut periarfissatuaralugit iliuuseqarfigineqarsinnaapput.

Ivaaraq: Ineeqqat ineqartunut ataasiakkaanut naleqqussagaapput, taamaammat angerlarsimaffippalaartumik kialaartumillu ilusilersugaapput. Init ataatsimoorfiit najugaqartunit tamanit atorneqarsinnaasutut ilusilersugaapput. Najugaqartut ilaat kaasuartakkanik atuisuupput, ilaallu pisunniuteqartarlutik. Taakku pisariaqartit pissutigalugit torsuusat pequtsersugaanngillat.

3) Ulloq unnuarlu angerlarsimaffinni nakkutiginninneq pitsaanerusoq

Ulloq unnuarlu angerlarsimaffiit pitsaanerusumik sakkortusisamillu nakkutigineqartariaqarput. Nakkutilliisussaatitaasut angajoqqaatut akisussaassusilinnut aamma attaveqartassaaq, tassami najugaqartut namminneq oqarsinnaanatillu isummersinnaanngillat.

Isumaginninnermi aqutsisoqarfik: Kommunit inatsit malillugu inummut sammisumik ineqartunik ukiumut marloriarlutik nakkutilliisussaatiaapput.

Ivaaqqap tungaanut tungnatillugu malittarisassat tamarmik aqutsisut tungaanniit malinneqarput, taamaammat nakkutiginnittoqarnerulernissaannik kinguneqartumik peqqarniitsumik sumiginnaasoqanngilaq.

Ivaaraq: Nakkutilliisussat tikilluaqquinnarsinnaavagut.

4) Siunnersortit terapeutillu amerlanerit

Ikiuutit pisariaqartinneqartut qulakkeerniarlugit, sungiusaanerit aamma ingerlatitsinerit soorlu pillorissaaneq aamma timimik sungiusaasut amerlanerit.

Isumaginninnermi aqutsisoqarfik: Sulisut ilinniarsimasut amigaataapput, kisianni piumasaqaat soorunami oqallisigineqarsinnaavoq, taamaalilluta aaqqiissutissarsisinnaalluta.

Ivaaraq: Siunnersortitut teraputitullu atorfiit saqqummersittarpagut, kisianni atorfiit uku inuttalersinnaanissaat ajornakusoorajuppoq. 

5) Sulisut akisussaaffiinik nalunaarsuinerit

Nalunaarsuivimmi sulisut qanoq najugaqartumut akisussaanersut takuneqarsinnaasariaqarpoq. Soorlu iisartakkanut, kina uffaasarnersoq, unnuarsiortut najugaqartunut nakkutilliisut aamma qaqugukkut pisarnersut.

Isumaginninnermi aqutsisoqarfik: Suliarineqartut tamarmik nalunaarsorneqartarput.

Ivaaraq: Kikkut ineqartunik ataasiakkaanik isumaginninnerat nalunaarsorneqartarput.

6) Sulisut amerlassusissaat amerlanerusariaqarput

Maanna Ivaaqqami sulisukippalalarpoq ulluinnarni suliassat naammasiniassallugit. Taamaalillutik sulisut tunngaviusumik pisariaqartinneqartunuinnaq naammassinnissinnaasarput, soorlu nerisitsinerit, nanginik taarsersuinerit aamma sinitsitsinerit. Angalanernut, sammisaqarnernut sungiusarernullu allarpassuarnullu piffissaqartoqanngilaq.

Isumaginninnermi aqutsisoqarfik: Piviusunngortinneqarsinnaanissaanut politikkikkut aalajangiisoqaqqaassaaq.

Ivaaraq: Sulisut amerlanerulersinnissaannut suliaqangaatsiartarpugut. Kisianni Ivaaqqap ajortumik eqqartorneqarnera oqaatigineqartarneralu pissutigalugit suliffissaatigut perlerineqartuaannanngillat.

7) Angutit unnuarsiortinneqassanngillat

Arnanut najugaqartunut angutit unnuarsiortinneqassanngillat.

Isumaginninnermi aqutsisoqarfik: Angutit sulisut tamarmik pasisaatissinnaanngilagut, aamma ulloq unnuarluarlu angerlarsimaffinni ulluuneranilu paaqqutarinniffinni sulisut amigaataareernerat pissutigalugu tamanna ajornakusoorpoq. Kisianni tamatuma sulissutiginiarnissaa soorunami periarfissaasinnaavoq.

Ivaaraq: Angutinik unnuarsiortoqarneq ajorpoq.