Nunat tamat nunarsuaq tamakkerlugu Issittumut Ukiorititaat kiisami ullumi aallartippoq.
Ilisimatusartut nunarsuatsinni tamaneersut isaat ukioq-manna aappaagulu issittumut tunngasunut sammissapput.
Ammaanersiorneq Københavnimi Illu Atlantikumi pivoq, suleqaterpullu Rosa Thorsen, ulloqeqqata siorna peqataavoq, imalu tusagassaqartitsivoq:
- Ilisimatusartut, politikerit tusagassiortullu 180-it Illu Atlantikumi najuupput, nunarsuaq tamakkerlugu Issittumi ilisimatusarnerit ullaatungaa nalunaaqutaq qulinut aallarnerneqarmata.
Kunngikkormiutut ataqqinassusilik, ammaanersiornermi ulloq naallugu ingerlanneqartussami peqataassaaq.
Ullaap-tungaani oqalugiartut assigiimmik oqariartuuteqarput:
- Issittoq pillugu ilisimasat annertusisariaqarput; silaannaap allanngoriartornera sukkasoorujussuarmik ingerlavoq, issittumi inuuneq allanngornermut malinnaasinnaanngilaq.
Nunarsuaq tamakkerlugu kissakkiartorneq unitsittariaqarpoq; kalaallit inuusaasiannik ilikkagaqarsinnaavugut; seqernup kissaanik nukissiorneq, pinngortitallu nammineq nukissiutai atornerusariaqarpavut, taamaammat kalaallit inooriaasaat aallerfigisariaqarparput, ilisimatusarnermi tusagassiortoq, Tor Nørretranders ammalluni oqalugiarnermini oqarpoq.
Kunngikkormiutut ataqqinassusillip, Kunngissaq Frederiup, peqataanini nuannareqaa:
-Kalaallit Nunaat soqutigilluinnartuuvara, eqqarsaatigaaralu ulloq naallugu maaniissallunga.
Ilisimatusarneq aliikkusersorneqarnerlu maani misigisassaapput, Kunngissaq oqarpoq – tassanilu ilaatigut taakkartorpaa, Minik Rosingip inuunermi takussutissat siullerpaat pillugit oqalugiarnera taakkartorlugu.