Issittup ukiua pillugu Nuummi ataatsimeersuassapput
Ataatsimeersuarnermi sammisassat assigiinngitsut katillugit aqqaniliupput. Assersuutigalugu piujuaannartitsinissaq pillugu piniartarneq aalisartarnerlu pillugu ilaatigut saqqummiussisoqassaaq.
Silap pissusaata allanngoriartornerata issittumut sunniutai immikkut aamma sammineqarumaarpoq, oqallittoqartassallunilu.
Ataatsimeersuarnermik aaqqissueqataasoq Birger Poppel, ICASS-imi præsidentimut aamma tullersortaasoq, oqarpoq piareersaanerit naammassineqaleruttortut:
- Inuppassuit inissaqartinneqarsinnaanissaat ajornartorsiutaanngilaq. Hotel Hans Egedemi, Sømandshjemimi, Nordbomi, kiisalu inissiat ilaanni umiarsuillu takornariartaatit ilaanni ineqartitsissagatta, Birger Poppel oqarpoq.
Inuiaqatigiit pillugit isummersortartutut ilisarisimaneqartoq Finn Lynge kiisalu ICC-p præsidentia Aqqaluk Lynge, ataatsimeersuarnermi oqalugiartussanut ilaapput. Oqalugiartut saniatigut ilisimatoorpassuit silap pissusaa pillugu paasisimasatik pillugit saqqummiussissapput.
Ataatsimiinneq Ilinniartititaanermut, Ilisimatusarnermut, Ilaageeqarnermullu naalakkersuisumit Tommy Marømit ammarneqassaaq, kingornalu Nuup borgmesteria aamma tiilluaqqusiumaarluni.