Issittup raajai Kinamut
Kalaallit Canadamiut Norgemiullu suleqatigiillutik raajanik Kinamut tuniniaarusupput, tamannalu pissutigalugu nunani taakkunani pingasuni raajarniarmik aallussaqartut Kinami ussassaareqatigiittussanngorput, avisimi Sermitsiami taama allaaserinnittoqarpoq.
Kina 1,3 milliartinik inoqarpoq, taamaattumillu avammut niuerfissatsialassuartut nalilerneqarluni.
Raajanik avataani qalariikkanik tuniniaanissaq siunniussaavoq, tunerusutanillu Kinamiut soqutiginnilernissaannut ussassaarinissaq ajornaatsuinnaassanngitsoq oqaatigineqarpoq, Kinamiut kiattup raajaanik nererusunnerummata.
Jens K. Lyberth Sulisitsisut Peqatigiiffiani GA-mi ataqatigiissaarisoq neriuppoq Kinami taama ussassaarinissaq kiattup raajaanut unammillerluarumaartoq ajugaajumaartorlu, ilisimaneqarmammi kiattup raajai tukertitsivissuarni assut minguttuuneersuusartut, raajallu nunatsinneersut assut minguitsuusut tukertitsivinneersuunatillu, avisimi Sermitsiami allaaserineqarpoq.
