Pisortanit aningaasaliiffigineqarnissaminik qinnuteqaraluarluni itigartitaanermi kingorna Canadami katersugaasivik, ”The North Life Museum” immaqa matuinnartariaqassasoq ernummatigineqalerpoq.
Katersugaasivik, Issittup kitaaneersunik katersugaaterpassuaqartoq, katersugaatimi iluarsarnissaannut 3 millioni koruuninik aningaasaliiffigineqarnissaminik qinnuteqarsimagaluarpoq, katersugaatitik 13.000-t missaanniittut, Canadami inuunermik oqaluttuartut, taamalillutik saqqummersissagaluaramikkik.
Itigartitsinerup kinguneranik katersugaasivik immaqa matuinnartariaqassaaq, katersugaatillu Forth Smithimiit Yellowknifemut nuuttariaqalissallutik.
- Tamanna maani inuiaqatigiinnut annertuumik annaasaqarfiussaaq, katersugaasivimmi pisortaaneq, Jeri Miltenberger, CBC-p Radioanut oqarpoq.
Katersugaasivik inunnit nuna tamaneersunit 4000-t missaannit ukiumut alakkarneqartarpoq.