Issittup imartaata sikua aakkiartuinnavippoq

Issittumi immap sikua ukiuni qulikkaani kingullerni aatsaat taama annikitsigisimavoq. Nannunut tamanna iluaqutaagunanngilaq, immammi sikusimanissaat nannut pisariaqartippaat.
Allattoq Mads Lynge
marsip 30-at 2011 02:38

Immap sikuata qanoq siaruaassimatiginera, Amerikamiut misissuisarfiata National Snow and Ice Data Centerip, ukiut 30-t missaasa matuma siornatigut nalunaarsortalerpaa, immallu sikuata 2005-2006-imi siaruaassimanera assigalugu ukioq manna aatsaat taamma annikitsigaaq, tassa 14,6 millionit kvadratkilometerisut annertussuseqarami.

Aviisip Anchorage Daily Newsip nittartagaani tamanna atuarneqarsinnaavoq.

Immap sikuata annertussusaa nalinginnaasumut naleqqiullugu 8 procentimik annikinneruvoq, tassami 1979-imiit 2000 tikillugu agguaqatigiissillugit 15,8 millionit kvadratkilometeriusarsimammat.

Immap sikuata ukioq manna siaruaassimanerpaaffia tassaasimavoq marsip arfineq-aappaat, marsillu 22-ata kingorna ullut tulleriit tallimat aakkiartorluni.

Tamatuma kingorna sikup aakkiartuinnarnissaa silap pissusaanik immikkut ilisimasallit oqaatigaat. Anorili issittarneralu ukiup taamaalinerani immap sikusarneranut sunniuteqartartorujussuummata, imaq sukkasuumik sikusinnaasoq aamma oqaatigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq