Issittup imartaani isumannaallisaanermut periusissaq aallartisarneqarpoq
Issittup imartaani isumannaallisaanermut periusissaq pineqartoq danskit naalakkersuisuisa ineriartortitsinissamik pilersaarutaata Det Blå Danmarkip ilagaa. Aallaqqaasiutitut Dansk Rederiforeningi Issittumi imaatigut angallanneq pillugu isumasioqatigiissitsiniarpoq, tamannalu Aalborgimi januaarip 20-iani pissaaq, aammattaaq danskit Imarsiornermut Aqutsisoqarfiat suleqatigalugu missingiutissat siulliit suliaralugit aallartinneqarsimapput. Tamannalu Issittumi imaatigut angallannermik ilisimasaqatut qanittumik suleqatigalugit pissasoq, Dansk Rederiforeningimi pisortap tulliata Jan Fritz Hansen erseqqissaatigaa.
- Royal Arctic Line siunnersuisussatut qitiulluinnartumik inissisimassaaq. Aamma Kalaallit Nunaanni oqartussaasut politikerillu oqaloqatigereerpagut. Aammattaaq Canada isumannaatsumik pitsaasumillu inerisaaqatigissallugu pitsaalluinnartuussasoq isumaqarpunga, aamma susassaqarfimmi suliassaqartitsinermut ilaqutaasinnaavoq.
Issittumi imaatigut angallannermut malittarisassat suliarineqarnerisa peqatigisaanik Naalagaaffiit Peqatigiit imarsiornermut suliniaqatigiiffia IMO Polar codemik taasamik suliaqarpoq. Malitarrisassalli tamagimmik pisariaqartinneqaratarsinnaapput, Jan Fritz Hansen oqarpoq.
-Polar code pitsaalluinnarpoq. Nunat tamat malittarisassaraat umiarsuarnut tamanut atuuttussat. Uagulli isumaqarpugut nunamut qanillattortilluni umiarsuarnut, umiartortunut allanullu piumasaqaatit sakkortunerulaartariaqartut.
Ilaatigut umiarsuaatileqatigiiffiit Issittoq pillugu ilisimasaqarluarnissaat malittarisassani aalajangersaavigineqarnissaat Rederiforeningip kissaatigaa.
-Tamannalu umiarsuaatileqatigiiffiit allaffiini sulisunuinnaq atuutissanngilaq aammali imarsiortunut atuutissalluni, taakkuuppummi pissutsini ajornakusoortuni angalanissamik ilisimasaqarluartussat. Aamma umiarsuit sananeqartarneri misissussavagut qanorlu ittunik ilisimasortaqartoqassanersoq kiisalu ajutoortoqassagaluarpat upalungaarsimaniarnissaq qanoq ittuussanersoq misissussavagut.
