Issittup imartaani assartuussineq qaammataasaq atorlugu nakkutigineqassaaq

Danskit naalakkersuisuisa ineriartortitsinissamik pilersaarutiminnut "Det blå Danmark"-imut atatillugu aalajangerput qaammataasaq atorlugu issittup imartaani umiarsuit angallannerisa AIS-imik misiligutaasumik nakkutigineqalissasut. Qaammataasaq suliniummut tassunga atorneqartussaq Indiamiut rakettiat atorlugu ataasinngorpat aallartinneqassaaq.

Allattoq Peter Troelsen, Simon Uldum

februaarip 21-at 2013 09:28

2013-imi umiarsuit tamarmik Automatic Identification Systemimik (AIS) atortorissaarusersorneqarsimassapput. Taamaaliornikkut umiarsuit umiarsuit allat sukkassusaannik, sammiviinik ingerlaartarfiinillu ilisimasaqarnissaat qulakkeerneqassaaq. Paasissutissat qaammataasameersut atorlugit umiarsuit Issittumi angalasut pillugit paasissutissanik amerlanerusunik pissarsisoqarsinnaanissaa naatsorsuutigineqarpoq. Peqatigisaanillu aamma siunissami paasissutissat pitsaassusaannik qulakkeeriniarnissaq akikinnerulersinneqassalluni.

-AIS-imit paasissutissat Issittumi imaatigut angallannermi isumannaallisaanissamut annertuumik periarfissaqartitsinissaat qularnanngilaq. Aalborg Universitet suleqatiginiarlugu toqqarsimavarput, AIS-imit paasissutissat qaammataasameersut ineriartortinneqarnerat nukittorsarusukkatsigu, Francis Zachariae, Imarsiornermut Aqutsisoqarfimmi pisortaanerup tullia aqutsisoqarfiup nittartagaanut oqarpoq.

Qaammataasaq Ålborg Universitetimi ilinniartunit sanaajusoq mikisuarannguuvoq. 10 x 10 x 10 cm-inik angissuseqarpoq 1 kg-innarmillu oqimaassuseqarluni. Qaammataasaq ataasinngornermi februaarip 25-iani Danmarkimi ullup qeqqata kingorna ingerlaalertussatut naatsorsuutigineqarpoq.

Issittup imartaani assartuussineq qaammataasaq atorlugu nakkutigineqassaaq

Aamma atuaruk