Issittup Imartaa pillugu KNAPK ernumavoq

Issittup imartaata mingutsinneqarnissaa kattuffiup piumasaqarneranut ilaatigut pissutaavoq.

Silap pissusaata pinngortitallu allanngoriartornerata issittup imartaa umiarsuarnit tikikkuminarsisippaa.

Allanngoriartornerli issitumi aalisarsinnaanermik aamma kinguneqarpoq, tamannalu KNAPK-mit iluarineqanngilaq.

Issittumi uumasut; arferit, aarrit timmissallu aalisarnermit umiarsuillu angallannerinit akornusersorneqassanngitsut aalisartut piniartullu kattuffiat isumaqarpoq. KNAPK-p siulittaasua, Leif Fontainé, soorlu ima oqartoq:

-Tassa annilaanngatigaarput uumasut taakku amerlassusaat, aamma nerisaqarniarnerat, innarlissasoq, peqassutsikkullu annertuumik innarlerneqarsinnaanerat annilaanngatigigatsigu. Aamma oqartariaqarpugut ilisimatuussutsikkut taavani imartap, massakkut suli sikuusup, nammineq pinngortitaassutsimigut qanoq ingerlaaseqarnera ilisimaneqanngimmat, Leif Fontainé oqarpoq.

Kalaallit Nunaanni Aalisartut Piniartullu Kattuffiat juunip ulluisa qulinganni aqqarngannilu ataatsimeersualerpat Kalaallit Nunaata Avannaani issittup Imartaani aalisarneq pillugu apeqqut oqallisigineqassaq.

KNAPK-p ukiunik 60-inngortorsiornera ataatsimeersuarnermi aamma malunnartinneqassaaq.