Issittumit Sikuiuitsoq kujallermut timmisartorluni angalaneq
Tuluit aviisiat The Telegraph nittartakkamini taama allaaserisaqarpoq.
Amerlanerpaamik inuit qulikkutaartillugit angalaqatigiissinneqartassapput, angalanissarlu taaguuteqartinneqarpoq "Tip to Toe-package" - niaqqumit putukkumut - tuluillu suliffeqarfiutaannit Private Jet Toursimit neqeroorutaalluni.
Angalaneq immikkut illuinnartoq aallarnerlugu Lutonimi tikilluaqqusilluni nereqatigissitsisoqassaaq. Angalasut Finlandimi illoqarfimmut Ivalomut aqaguani aallassapput, tassanilu akunnittarfimmi Kakslautanen Hotelimi ulluni pingasuni najugaqassallutik. Apummik illuikkiani illuaqqanilu najugaqassapput issittumilu pinngortitamut angallanneqassallutik.
Sammisassaallu ilagaat tassaapput sisorarneq, qimminik tuttunillu qimuttulerluni angallassinerit, sikumi aalisarneq kiisalu sikusiummik Sampomik angalaneq. Januaariummallu aamma arsarnerit takunissaannut periarfissaqassaaq.
Kingorna Sydafrikami Cape Townimut ingerlaqqissapput, tassanilu akunittarfimmi Cape Grace Hotelimi najugaqassallutik. Tassaniissinnarlutik russit timmisartuliaannik Ilyushin 76-mik Sikuiuitsumut kujallermukassapput.
Tassani nammineq toqqagassaqartitsisoqassaaq, soorlu pisuttuarnerit, kiterunik sisorarnerit aamma qaarusunnut sermiusunut assigisaanullu takornariarnerit. Aammattaaq isarukitsunik kejserpingvineqarfissuaq takuniarneqarsinnaavoq ilisimasarfimmullu qanittuaniittumut pulaartoqarsinnaalluni.
Angalaneq 69.995 Pundinik akeqassaaq, imaluunniit 670.000 koruunit missaannik. Aningaasallu isertinneqartut ilarpassui ajunngitsuliornermut tunissutigineqassapput, meeqqat assigiinngitsunik innarluutillit Floridamut angalatinneqartarnerinut suliniaqatigiiffimmut tunissuteqartoqassammat.
