Issittumi takornariartitseqatigiit nutaat
Takornarianik angalatitseqatigiiffittaaq ateqarpoq Explore Greenland. Inuit ataasiakkaat angalaqatigiilluunniit - kisimiillutik angallassisulerlutilluunniit - Issittumi angalanissaannik Explore Greenland isumaginnittassaaq.
Pisortanngortoq tassaavoq Tommy Kanstrup, Mogens Gislinge Mette Mandrup-ilu suleqatigalugit ingerlatseqatigiiffimmik matusariaqarnikuusumik Grønlandseksperten-imik aallartitseqataasoq. Grønlandseksperten Kangerlussuaq Tourism akiliisinnaajunnaarmat kalitaavoq.
Explore Greenland aallartiinnarluni angalanissanik arlalinnik neqerooruteqalereerpoq, assersuutigalugu Kangerlussuarmut Ilulissanullu upernaaq manna takornariartitsinerit, Kangerlussuarmi weekendertitsinerit, Avannaani sumiiffiit arlallit tikillugit takornariartitsinerit aamma Umiarsuaq takornariartaat Fram ilaaffigalugu qallunaatsiaanik tumisiuuneq, kiisalu Sikuiuitsumut Kujallermut takornariartitsinerit.
Angalatitseqatigiiffittaap aamma anguniarpaa Islandikkoorluni Kalaallit Nunaannut tikeraartitsisalernissat.
- Nunat Atlantikup avannaaniittut tamaasa takornariarfissatut neqeroorutigisalerusuppagut, pisortaq Tommy Kanstrup, aamma Hotel Icefiordimik aallartitsisuusoq oqarpoq.
Explore Greenland Københavnimi allaffeqarfeqarpoq.