Issittumi takornariaqarneq aarlerinartortaqarpoq
Issittup imartaani takornarianik angallassisarneq ulorianaatigisinnaasaalu pillugit Canadamioq atuakkiortoq Peter Maher atuakkamik saqqummersitsivoq.
Umiarsuit takornarianik angallassisut siorna aasakkut issittup imartaatigoortillutik aammalu Sullualukkoortillutik ajornartorsiuteqarput, umiarsuit ilaat ikkarlipput, ikkarluit nalunaarsorneqarsimanngitsut ikkarliffigigamikkit.
Umiarsuarni naalakkat tamarmik issittup imartaani angalanermi ilisimasariakkanik tamakkiisumik ilisimasaqannginnerat, Peter Maherip aamma taakkartorpaa.
Takornariat Canadami nunaqarfinnut tikikkaangamik periarfissaat atuakkiortup aamma sammivaa.
Labradorimi nunaqarfimmiut takornariat tikinnissaannut takornariartitsivinnit maannakkut piareersartinneqartut atuakkami aamma allaaserineqarput.
Kulturikkut takutissinnaasaminnik aaqqissuussisinnaanerannik, kaffisortitsisinnaanerannik aammalu nunaqarfimmiut assassortartuisa sanalugaannik tuniniaasinnaanerannik piareersartinneqarlutik. Taamaasiornikkut ulorianaataasinnaasut aningaasatigut iluanaarnermut saateriarnissaat anguniarneqarpoq.
