Issittumi siunnersuisoqatigiit allaffiat Tromsømiiginnassaaq

Oqallissutaaleraluarpoq Issittumi siunnersuisoqatiigiit aalajangersimasumi inissisimasumik allattoqarfeqassanersut taamaassappallu sumi inissisimassanersoq. Tamanna isummerfineqartussat ilagaat issittumi nunanut allanut ministerit - atsioqatigiinnermik naggaserneqartussamik - Nuummi sisamanngornermi ataatsimiilerpata. Ulluni kingullerni nunat ilaasortat arfineq pingasuusut atorfilittaat nunallu inoqqaavisa kattuffii arfiniliusut ataatsimeeqattaarput isumaqatigiissutissat immikkuualuttortai inissinniarlugit.

Allattoqarfiup inissinneqarfigisinnaasaatut siunnersuutigineqartut ilagisimavaat Islandimi illoqarfiit pingaarnersaat Reykyavik, maannali taakku tassa Tromsømit qaangerneqannguatsiarput tassani aamma issittumi pissutsit pillugit ilisimartusarfeqarmat.

Issittumi siunnersuisooqatigiit allattoqarfiata suliassarai allaffissorneq, ataatsimiinnerit pilersaarusiornerat, ilisimatuussutsikkut nalunaarutit siammartertarnerat aamma siunnersuisoqatigiit sulinerata ataavartumik ingerlanissaata qulakkeernissaa siulittaasoqarfiit nikeraraluartut.

Nunat ilaasortaatut tamarmik immikkut aningaasaliisassapput. KNRip paasisai malillugit taakku 1 million dollarsinik amerlassuseqassapput.