Issittumi siunnersuisooqatigiinnut peqataarusuttorpassuit

- Issittumut soqutiginninneq annertusigaluttuinnartoq misigaarput, issittumi ineriartorneq silap pissusaata allangorneratigut umiarsuarnernik angallavigineqarsinnaalernera pissutigalugu, issittoq pillugu Danmark-ip ambassadøri-a Klavs Holm aviisimi Berlingske Business-imi apersorneqarluni oqarpoq.

Danmark Skandinaviami nunat allat peqatigalugit nunat pissaanilissuit nutaat, Kina ilanngullugu alaatsinaatsutut inissisimalernissaat qangali illersorpaat

- Ataatsimoorfiusumut tassunga attuumassuteqarnissaat iluaqutaassaaq, Klauvs Holm oqarpoq.

Issittumi nunat tamarmiullutik isumaqataanngillat.

Alaatsinaatsutut inissisimalernissamik qinnuteqatunut tunngasoq, nunat issittumi aallartitaat Tromsø-mi qanittumi ataatsimiikkamik isumaqatigiissutiginngitsooraat, aviisi Berlingske taama allaaserisaqarpoq.

Aalajangertoqarnissaali nukinginnarsigaluarpoq. Alaatsinaatsutut inissimalernissamik qinnuteqaatit Issittumi Siunnersuisoqatigiit ataaatsimiinnissaat maj-imi pisussaq sioqqulugu ministerit aalajangiiffigisussaammassuk.

Indiap aamma Kinap tamarmik milliard-it sinnerlugit innuttaqartut, Issittumi Siunnersuisoqatigiinni ammaarneqarnissaannut Canada aamma Rusland qularlutik oqarnikuupput.

Nunat taakkua angisuut alaatsinaatsutut inissisimalerunik, nunanik issitumiittunik politikkikkut tatisimaneqalernissaat ernummatigigamikku.

Naggueqatigiit inuit nunarsuaq tamakkerlugu kattuffianni siulittaasuuvoq Canada-mioq Duane  Smith. Taassuma erseqqissatigaa, nunap inoqqavii nunarsuup avannaatungaaniittut, Issittumi Siunnersuisoqatigiinni manna tikillugu pingaarutilittut inissisimasut, Duane Smth-illu ernummatigaa, nunat pissaanilissuit nutaat ilaasortanngorpata, nunat issitumiittut pingaarutillittut inissisimajunnaarnissaat.

- Nunat alaatsinaatsutut inissisimalernissamik qinnuteqartut sunik tuniussassaqarnersut aperisariaqarpagut, Duane Smith oqarpoq.

EU Issittumi Siunnersuisoqatigiinni ilaanngortanngornissamut qinnuteqarmat, Canada-mit itigartitsissutigineqarpoq.

Tamana pivoq, puisinit pisunit EU-mut eqqusseqqusiunnaarneq EU-p atuutilersimmagu. Puisinit tunisassiat Kalaallit Nunaanni aamma Canada-p issittortaani nunap inoqqaavininut pingaaruteqarluinnartuupput.