Issittumi sakkutuulersuiniarnermut Russit minitaajumanngillat
Oqaaseqaatit nunanut allanut naalakkersuinikkut sillimaniarnikkullu qaninnerusumik suleqatigiinnissamut nunat avannarliit pilersaarutaannut, sapaatip akunneri marlussuit matuma siornagut Norgep nunanut allanut ministererisimasaata Thorvald Stoltenbergip Nordisk Rådimi siunnersuutaanut, toqqaannanngikkaluartumik akissutitut isigineqarsinnaavoq.
Stoltenbergip nalunaarusiaani nunani avannarlerni ataatsimoortumik nunani issittuni illersornissamik suliniuteqarnissaq siunnersuutigineqarpoq, ilaatigut Ruslandip tamaani suliniuteqarniarnerulerneranik patsiseqartumik.
Taamaalillunilu ullumi russit tungaannit oqaaseqaat siulleq takkuppoq.
- Rusland ”naleqquttunik sakkulersuutit” atorlugit nunani issittuni qanorluunniit iliorluni sakkutuulersuinissaq misilinniarlugu akissuteqarniarpoq, Ruslandip sakkutooqatigiivinut qullersatut naalakkiuteqartartoq general Nikolai Makarov oqarpoq.
Tamanna Arabiamiut kunngeeraqarfianni Abu Dhabimi tikeraarnermi pisoq, nutaarsiassaqartitsivik Interfax nalunaarpoq.
