Issittumi Sakkutooqarfiup Islandillu sinerissamik alapernaarsuisuisa suleqatigiinnertik annertusarpaat
![](/sites/default/files/styles/image_934x467/public/article_images/2016-04-05_underskrivelse_af_samarbejdsaftale.jpg?itok=FOG1Tr1D)
Imartani avatangiisit pillugit suleqatigiissutissat, assersuutigalugu uuliakoortoqarsimatillugu misissuinerit, annertusarneqassapput, assillu imartanik nakkutiginninnermut atorneqarsinnaasunik avitseqatigiittarnissaq pillugu isumaqatigiissutit atsioqatigiissutigineqarlutik.
Issittumi Sakkutooqarfik Icelandic Coast Guardimik Nuummi sapaatip-akunnerata siuliani ataatsimeeqateqarpoq, assigiinngitsutigullu suleqatigiinnerulernissaq pillugu tassani atsioqatigiittoqarluni.
- Islandip sinerissamik alapernaarsuiffianik isumaqatigiissusiornerput nuannaarutigeqaara, ukiorpassuanngortuni suleqatigiinnerup ineriartortitseqqiineruvoq. Assigiinngitsorpassuartigut suleqatigiissuteqalissaagut, assersuutigalugu ujaasinernut annaassiniarnernullu tunngasunut suleqatigiissuteqalissalluta, avatangiisinillu nakkutilliinernut tunngasunik suleqatigiissuteqalissalluta, Kim Jesper Jørgensen, Issittumi Sakkutooqarfiup qullersaa oqarpoq.
Suleqatigiissutigineqartunut allanut aamma atuutissaaq
Suleqatigiinnermut isumaqatigiissutip nutarterneqarneranut atatillugu suleqatigiissutissat assigiinngitsut nukittorsarneqarput:
- Assinik imartamik nakkutiginninnermut tunngasut pillugit avitseqatigiittalernissarput isumaqatigiissutigaarput. Imartami tamaani angallannerup ullumikkut inissisimanera annerusumik paasisimasaqarfigilissavarput, ujaasinerit annaassiniarnerillu pillugit suleqatigiinnerulersinnaassalluta, sakkutuut naalagaat Kim Jesper Jørgensen oqarpoq.
Assinik avitseqatigiittarnerup ukioq massuma naannginnerani aallartereersimanissaa naatsorsuutigineqarpoq.
Islandimiut qulimiguuliutaasa annaassiniarnernut atorneqartartut Danmarkip umiarsuaataanni qulimiguulinnut mittarfilinni orsersorsinnaanersut aamma misissorneqassasoq oqaatigineqarpoq, Islandimiut qulimiguuliutaasa ungasinnerusumut ingerlaarsinnaanissaat taamaalinikkut anguneqarsinnaassalluni.