Issittumi Sakkutooqarfimmit inissiffigineqarusuttut tusaqqusaarput
"Kangilinnguani Sakkutooqarfik Savalimmiunilu Sakkutooqarfik ataatsimuulersinneqarpata, Issittumik sakkutooqarfiulerlutik, Nuuk inissiffiuppat pitsaanerpaavoq". "Naamik, umiarsuit nakkutilliissutit sakkutuullu soorunami Narsarsuarmiittariaqarput. Taannami pitsaanerpaavoq". Folketingip illersornissaq pillugu ataatsimiititaliaani ilaasortat paasisassarsiorlutik Nunatsinniinneranni tusaqqusaartut imaaginnavipput, taakkununnga Kommune Kujallermi borgmester Simon Simonsen ilaalluni.
- Maannakkut tusarnaarpugut. Sumiiffinni marlunni pingasuniluuniit iluaqutissat maanna takuniarpagut, paasissutissanik iluaqutissatsinnik peqarniassagatta. Tassami suleqatigiissitat aqutsisoqatigiillu ukiup ataatsip missaani qaangiuppat siunnersuutinik saqqumiussissapput. Tassalu siunnersuutit saqqummiunneqarpata, uagut ataatsimiititaliami ilaasortaasugut sumiiffiit piukkunnaataat takoreersimasariaqarpagut. Folketingip illersornissamut ataatsimiititaliaani siulittaasoq, Hans Christian Thoning, taama oqarpoq.
Taanna ataatsimiititaliani ilaasortat allat ilagalugit Narsarsuarmut pingasunngornermi ullup qeqqata siorna tikippoq.
Taava Pituffimmi sakkutooqarfimmut tikeraassapput. Tassami pilersaarutaavoq, danskit illersornissamik aaqqissuussineranni Pituffik pingaaruteqarnerulissasoq.
Danskit Issittumi Sakkutooqarfissaata inissisimaffissaatut Island aamma Aalborg piukkuneqartunut ilaapput.
- 2012-imi aalajangernissaq ilimanartupilussuuvoq, Hans Christian Thoning oqarpoq.
