Politiit ullormut nalunaarutaat: Issittumi Sakkutooqarfik aamma politiit unnuami ajunaalernermi ikumatitaq takuneqartoq misissuiffigileraat

Qaqortup eqqaani Inussummi inuk ajunaalernermi ikumatitamik takunnissimalluni politiinut decemberip ulluisa 28.-anni nalunaaqutaq unnukkut qulingiluanut qiteqquteriitsiartoq sianerpoq.

Kalaallit Nunaanni politiit pigaartuat Jeppe Andsagerip oqarnera naapertorlugu sumiffimmut pineqartumut ornigussinnaasimanngillat. 

-Angallaterput ajormat attartugassaqanngimmallu ajunaalernermi ikumatitamik takunniffik orniguffissuiffigisinnaanngikkitsik, oqarpoq.

Inunnik tammaasaqartoqarneranik Kalaallit Nunaanni Politiit nalunaarfigineqanngikkaluartut innuttaasut ajunaalernermi ikumatitamik takunnissimasinnaasut allat attavigerusuppaat.

Aasiaat Radiunut ajunaalernermi ikumatitat pillugit nalunaarfigineqarsimanngitsut, Jeppe Andsagerip ilanngullugu oqaatigaa. 

-Ajunaalernermi ikumatitaq pillugu suli politiit paasisaqanngillat aamma Aasiaat Radiuanut kalerriisoqanngilaq, Jeppe Andsager oqaluttuarpoq.

Annerusumik misissuiniarpisi?

-ilimananngilaq, naagga. Sulili sumiiffiimmi takunnissimasunik ilisimannittunilluunniit attavigineqarnissatsinnut utaqqivugut.

Nuup akiani ajunaalernermi ikumatittagaq

Nuup akiani qeqertat ilaanni inuit arlallit ajunaalernermi ikumatittakkamik takunnissimallutik kalerriuteqarput. Kalerriisoqarniariartoq sumiiffimmut politiit angallatertik Nakuaq atorlugu ippassaq unnukkut aqqaninngulersoq ornigupput.

Inunnilli takusaqarsimanngillat, ujaasinerlu unnuaq unitsikkallaneqarpoq.

Ukiutoqalerami qommoroortaatillu atugaalereerlutik, suli nalunarpoq qanorpiaq pisoqarnera, Jeppe Andsager oqarpoq.

Ullaap tungaa decemberip ulluisa 29.-anni Kalaallit Nunaanni politiit tamatumuuna taxartitsisumit ajunaalernermi ikumatittakkanik Nuup avannaatungaani takunnissimasumik kalerrinneqarput.

Tamanna peqqutaalluni Politiit angallamminnik Nakuamik avalaqqipput, aamma Kalaallit Nunaanni upalungaarsimasut peqatigalugit ilaatigut umiarsuaq Triton qulimiguualu Seahawk ujaasigasuarnermi ikiortiserineqarput.

-Ilaanni taama ajunaalernermi ikumatitsisut sumiissusersiniartarneri ajornakusoorsinnaasarpoq. Tamatumuunali sumiiffik tikkuarneqartoq nalorninanngimmat toraarluarlugu ujaasissaagut, Nakuaq sumiiffimmut apuutingajalissaaq aamma qulimiguulik umiarsuarlu Triton iluaqutaassasut, Jeppe Andsager naggasiivoq.

Suliamut atatillugu nalunnginnissinnaasut politiinut oqarasuaat 70 14 48-mut attaveqaqquneqarput.