Issittumi misigisassarsiortarfissaq taamaatippaat

Ilisimasanik katersuiffissuarmik misigisassarsiortarfissuarmillu suliassap pilersaarusiornerani Arktisk Instituttip ukiup affaa atorpaa. Suliniut Hellerup-imi Experimentarium-imi misigisassarsiortarfissuarmut assigusuunissaa eqqarsaataasimagaluarpoq.

Aningaasaateqarfiimmi arlallit suliassarujussuarmut 48 millionit koruuninik aningaasaleeqataanissartik ammaffigigaluaraat qallunaat naalakkersuisui Københavnillu Kommunia ilaarusussimanngillat. Ilisimasanimmi katersuiffissuassaq misigisassarsiortarfissarsuarlu imminut akilersinnaasumik ingerlassappat pisortanit tapiiffigineqarnissaa avaqqussinnaanngimmat, Arkisk Instituttimi pisortaq Bent Nielsen ugguarpaloqaluni nassuiaavoq.

- Aningaasat kaaviiaartitaasussat missingersoratsigit imminut akilersinnaarpasinngilaq. Aningaasartuutissammi isertitaasussaniit amerlanerussapput. Taamaammat suliniutip uuma unitsinneqaannarnissaa siulersuisunit aalajangiunneqarpoq, Bent Nielsen oqarpoq.

Københavnilli kultooreqarnermut borgmesteria paatsuugassaanngitsumik naaggaareermat Danmarkillu ilinniartitaanermut ministerianik ataatsimeeqateqarnissaq taamaatinneqarmat Arktisk Institutip pisortaa tunniutiinnarpoq suliniullu unitsiinnarneqarluni.

- Suliniutip piviusunngortinneqarnissaa soorunami oqaatigerusunnerugaluarpara. Aningaasalli kaaviiaartinneqartussat ikippallaarnissaat paasigatsigu Arktisk Instituttimi siulersuisuusugut suliniutip unitsiinnarneqarnissaa aalajangiutariaqarsimavarput. Maanna aningaasaqarniarnerup patajaatsuunissaanik qulakkeerinnittussamik pissarseriataanngikkutta ingerlariaqqissinnaajunnaarpugut, aamma kina kikkulluunniit taamatut qulakkeerinnissinnaassanersut eqqoriarsinnaanngerluinnarpara, Bent Nielsen oqarpoq.

Qanga amminik toqqorsiviusimasumi Issittumi Ilisimasanik katersuiffissarsuaq Misigisassarsiorfissarsuarlu sanaartorneqartussaagaluarpoq. Nordatlantens Bryggeli maanna inissianik ikaartarfinnillu sanaartorfioqimmat sanaartorfiusussaagaluap Bygningsstyrelse-millu pigineqartup allanik soqutigineqarnissaa Bent Nielsenip ilimagaa.

- Sanaartorfiusussaagaluap arlaannit pilerigineqarnissaa ilimanarluinnarpoq. Bent Nielsen oqarpoq.