Issittumi inuuniarnikkut atugarisat misissuiffigineqarnerat saqqummiuneqarpoq
Kalaallit Nunaanni ilisimatuussutsikkut misissuisoqartillugu angusat paasisallu europamiunut sanilliunneqartarput. Issittumi inuuniarnermi atugassarisitaasunik misissuinermi
naggueqatigut inuit Canada-miittut Alaskamiittut Chukotkamiittullu maannakkut sanilliunneqarput.
Misissuinermi paasineqartut ilagaat Kalaallit Nunaanni nunaqarfinni illoqarfinnilu inuit najugaqarfigisatik qimanneq ajoraat, inuussutissat oqaatsit ileqqullu atatiinnarniarlugit aammalu pinngortitamut qaninneruneq, taamatut oqarpoq Issittumi inuuniarnermi atugassarisitaasunik misissuinermi kalaallit nunaanni misissuisoq Birger Poppel nangipporlu:
- Inuit najugaqarfimmiiginnarnissaminnut patsigisartagaat arlaqarsinnaapput. Misissuinitsinni inuup nukissaqassususia sumit aallaaveqarsinnaanersoq paasiniarparput; ilaquttanut attaveqartarneq nukittorsaataasarpoq, inuttut attaveqarfigisartakkat nukittorsaataasarput, inooriaaseq aamma qanoq ittuunersoq nukissaqassutsimut apeqqutaalluinnartarpoq. Apeqqutinut ilaavortaaq nuunnissamut nukissaqartoqarnersoq, nunaqarfinnimi ilinniagaqassuseq illoqarfimmiunut sanilliullugu suli appasinneruvoq, nunaqarfimmiorlu illoqarfimmut nuussaguni ilinniakkani aallaavigalugu atorfininnissaa qularutigineqarsinnaavoq, killormulli nunaqarfimmioq najugarisamini aalisartuullunilu piniartutut inuusinnaaguni tassunga atugassarittaasut ajunnginnerupput Birger Poppel oqarpoq.
Issittumi inuuniarnermi atugassarisitaasunik misissuinermi paasisat ilagaat naggueqatigut Rusland-imiittut Tjukotkamiut, inuuiarnermikkut atugaat. Misissuinermi apeqqutigineqarpoq inuuniarnermi atugarisat ajunngilluinartuunersut, naggueqatigullu Tjukotkamiut 1 procentii taamaallaat ulluinnarni inuuniarnertik ajunngillluinnarnerarlugu akissuteqarsimapput kalaallillu 17 procentii inuuniarnermikkut ajunngilluinnarneraallutik akissuteqarsimallutik. Mississuinermi apeqqutigineqartut ilagaat ulluinnarni inuuniarnikkut atugarisat ajorluinnassusiannik apeqqut, tassani kalaallit 2 procentii inuuniarnikkut atugarisat ajorluinnarnerarsimavaat, Tjukotkamiullu 40 procentiisa inuuniarnermikkut ajorluinnarneraallutik.
Birger Poppel Issittumi inuuniarnermi atugassarititaasunik misissuinermi Kalaallit Nunaanni ingerlatsisuuvoq. Misissuinermi misissuiffigineqartut tassaapput Rusland-imi Chukotka-miut, Alaska-mi Canada-milu naggueqatigut Inuit, soorunalumi aamma kalaallit. Misissuinermi angusat qarasaasiamut iliorarneqarnissaat takorloorneqarpoq, issittuni ilisimatusarnermi atorneqarsinnaasunngornissaat eqqarsaatigalugu.
