Issittumi ingeniørinngorniat amerliartortut
- Kalaallit Danskillu tamaasa ilinniartuutigaagut, kalaallilli amerlaneroqaat. Ilinniartut sisamaagaangata pingasut kalaaliusarput.
Ukioq kingulleq ilinniartut 19-it aallartipput ukioq mannalu 20-it ilinniarnerminnik aallartitsillutik.
Sooruna taama ilinniartut amerlatseriarsimatigisut?
- Isumaqarpunga ilinniartuutigut inuiaqatigiinni Kalaallillu Nunaanni atorfigissaarlutik inuusussaammata maligassatut isigineqartut.
Inuusuttut nuannaartorinninnermikkut ilinniakkaminnik aallartitsinissaat apeqquserneqarsinnanngilaq. Issittumi ingeniørit atorfimminni siammarsimapput, nalunngilaat naammassigunik nunaminni atorfissaqartinneqarlutik, Arne Villumsen Danmarks Universitetimi aqutsisoq taama oqarpoq.
Ingeniøritut ilinniakkaminnik naammassinnilersut ilagaat Lars Peter Lennert
- HTX-imi ilinniarnertuunngorniarninni arktisk ingeniørimut atuartut malinnaavigalugit soqutigilerpara. Naammassiguma suli naluara sumut ingerlaqqissanerlunga, periarfissat amerlaqaat. Danmarkimi sanaartornermut tunngasunik ilinniagaqaqqissinnaavunga. Eqqarsaatigaarali Kalaallit Nunaannut angerlarusullunga, Lars Peter Lennert oqarpoq.
Ilinniartut ilagaat Taatsi Olsen, taassuma ilinniakkaminik naammassinnikkuni angerlarnissani naatsorsuutigaa
- Arktisk Ingeniørimut atuarneq Avannaani Ilinniarnertuunngorniarfimmi saqqummiunneqarmat ilinniassallugu soqutiginnilerpunga. Naammassiguma Kalaallit Nunaanni suliffissat soqutiginarsinnaasut misissoriarlugit nunatsinnut uternissara naatsorsuutigaara, maanili civil ingeniørimut ilinniaqqinnissaq periarfissaavoq taannalu itinerusumik eqqarsaatiginikuunngilara, Taatsi Olsen oqarpoq.
