Issittumi illersornissamut inissisimanera pingaarutilik
Illersornissamut ministeri aviisimut Berlingske Tidendemut ullumi taama oqarpoq. Issittumi illersornissakkut isumagisassanut nutaanut aningaasassarsiornissaq ajornakusuussaqisoq, illersornissamut ministerip nassuerutigaa. Tamatumunngali atatillugu erseqqissarlugu Kalaallit Nunaata Danmark nunanut allanut tunngatillugu pingaarutilimmik inissimmagu, taamalu akiligassaqarfittut isigineqarani tunissutitut isigisariaqartoq.
Sakkutooqarnermut immikkut ilisimasallit nalunaarusiami oqaatigaat, Nunatta pisariaqartitai tassaasut, alapernaarsuineq annerusoq, annaassiniarnissamut upalungaarsimaneruneq aamma killeqarfiup nakkutigineqarnerunissaa.
Tamannali mianersuunneqartariaqarpoq, tassami tamanna Danmarkip issittumi sakkutuulersuinialerneratut isigineqassanngippat, Issittumi suliniuteqarnerulerneq Issittumi sakkutuuliinermik isigineqartariaqanngimmat. Nalunaarusioqataasut ilaat Esben Salling Larsen aviisimi Berlingske Tidendemi taama mianersoqqusivoq.
Danmarkip ataatsimoorussamik Issittumi Sakkutooqarfiliorniarnera aamma immikkut suliniuteqalernera, nunat issittumiittut allat ernumanartoqartikkaat, nalunaarusiami oqaatigineqarpoq.
Taamatullu ernummateqartoqarnera illersornissamut ministerimit Nick Hækkerupimit tusaaniarneqarpoq, taassumalu erseqqissarpaa, nunat issittumiittut tallimat suleqatigiinnissaat pingaarutilerujussuusoq.
