Issittumi ilisimatusartut marluk ajunaarsimassangatinneqartut

Angutit taakku marluk, ataaseq 46-nik ukiulik, ataaserlu 30-nik ukiulik, "The Last Ice Survey Expedition"-imik taallugu Canadap Issittortaanut marsip ulluisa 23-anni aallarput. Ilisimasassarsiorluni angalaneq sikup kingulliup misissuiffineqarnissaa pillugu ilisimasassarsiornermik nutserneqarsinnaagunarpoq. Canadami nunap immikkoortuata pineqartup Issittumi sikusartuni 2050-imi kingulliunissaa ilisimatuutut misissuinerit aallaavigalugit eqqoriarneqarpoq.

Angutit taakku marluk immiussaminnik qarasaasiatigut attaveqaqatigiittarfikkut Twitterikkut apriilip ulluisa 28-anni ikkussisimapput, tamaani ilimagisamit kiannerusimagunarnera pissutaalluni ikiaqutaannaallutik angalanertik oqaluttuarigaat immiussami tusaaneqarsinnaalluni.

Ujaasineq angusaqarfiunngilaq

Taava Resolute Bayimi, tassa Qaasuitsumi politiit ajunaalernermik kalerrisaarummik aqaguani tigusaqarsimapput, naallu timmisartut atorlugit ujaasisoqaraluartoq, periarfeerunneqarfiatalu nalaani qulaavaasoqaraluartoq, ilisimatuut marluk taakku nassaarineqanngillat, atortui qimmiutaallu qimuttut taamaallaat siumorneqarsimallutik. Tamaani siku saatsuararsuusimavoq.

Ajunaalernermik kalerrisaarutip nassiunneqarneranit ullut pingasut qaangiutereersut, tassa tallimanngormat, Hollandimiunik marlunnik taakkuninnga ujaasineq taamaatiinnarneqarpoq.