Issittumi ilisimatusarnernut atatillugu ilinniaqqinnernut aningaasaliissutit agguaanneqartut
Siunnersuisooqatigiimmi qinnuteqartut 16-it piukkunnaateqarluartut akornanni aningaasaliiffigineqartut toqqarpaat, siunnersuisooqatigiit siulittaasuat, Minik Rosing tusagassiorfinnut taama nalunaarpoq.
Aningaasaateqarfik katillugit 7,3 millionit koruuninik aningaasaliivoq, ilisimatusartullu sisamat Kalaallit Nunaanni Ilisimatusarnikkut Siunnersuisooqatigiivinit aningaasaliiffigineqarput.
Aningaasaliiffigineqartut ilisimatusariaatsinit assigiinngitsuninngaanneerput, tassa aalisakkanut saarullernanut ilisimatusarneq, kalaallisut oqaaseqatigiilioriaatsinut ilisimatusarneq, rubiinit kemiskimik katitigaanerannik ilisimartusarneq silallu pissusiata allanngoriartornerata kingunerisaanik kulstoffeqalersarnermik ilisimatusarneq aningaasaliiffigineqarlutik.
Suliniutit danskit kalaallillu akornanni ilisimatusarnikkut suleqatigiinnermik siuarsaaqataassapput
Ilisimatusartut suliniutissaat Kalaallit Nunaanni piginnaasatigut qaffassaaqataammata kiisalu danskit kalaallillu akornanni ilisimatusarnikkut suleqatigiinnermik siuarsaaqataammata toqqagaapput.
Pinngortitaleriffik aningaasaliissutinik ilaatigut Namminersorlutik Oqartussanit ilisimatusarnermut aningaasaliissutigisartagaannik qallunaallu aningaasanut inatsisaatigoortumik Issittumi ilisimatusarnermut aningaasaliissutigisaannik aqutsisuuvoq.
Danskit aningaasanut inatsisaatigoortumik 5,1 millionit koruuninik aningaasaliipput.