Issittumi ilisimatusarnermut 100 mio. kr.-it

Avannaarsuani issitup imaani pissutsinik ilisimatusarnissarsuarmut Canadami naalagaaffik 100 million koruuninik aningaasaliiniarluni aalajangerpoq.

Issittup imaani misissueqqissaarnissami aningaasat 200 millionit atorneqartussatut naatsorsuutigineqarput, taamaasillunilu aningaasartuutissat affai Canadami naalagaaffiup matussuserpai.

Ilisimatusarnissami ilisimatuut nunanit assigiinngitsunit 16-ineersut 200-t peqataassapput. Taakkua qaammatini 15-ini avannaarsuani issittup imartaata sikoqanngitsortaani ilisimatusarniarput. Paasiniarneqassaaq issittumi sikup aakkaluttuinnarnera, siunissamilu kingunerisinnaasai.

- Issittumi sikup qanoq allanngoriartorumaarnera nungukkaluttuinnarneralu, immap naqqaniit qaavanilu siku ilanngullugu misissuisoqassaaq, taasumalu saniatigut silaannaq aammalu arferit virusillu assigiinngitsut misissorneqassapput, Manitobami ilisimatusarfimmi proffessori Dave Barber oqarpoq.

Misissuineq silaannaap kiatsikkaluttuinnarneranut aammalu issittup ukiorititaanut atatillugu ingerlanneqassasoq, CBC north allappoq.