Issittumi ilisimatusarnerit pillugit isumaqatigiissusiortoqarpoq

Pinngortitaleriffik, University of Manitoba, Canadameersoq, Aarhus Universitetilu "Arctic Science Partnership"-imik taaguuserlugu Issittumi ilisimatusarnikkut suleqatigiinnissamik sapaatiummat atsioqatigiissuteqarput.

Suleqatigiissutigineqartussat siammasittupilussuussapput, peqqissutsimut, inuiaqatigiit aningaasarsiornerannut kiisalu avatangiisinut silallu pissusaanut tunngassuteqassallutik.

Ilinniarnerminnillu naammassinnittut suliffeqarfinni assigiinngitsuni atorfissaqartinneqassaqisut, Ilinniartitaanermut, Ilisimatusarnermut Nunanullu Avannarlernut Suleqateqarnermut Naalakkersuisup Palle Christiansenip qularutiginngilaa:

- Ilinniartunngorumaartussat ilinniartissinnaalissavaat, ilikkakkatik taamaasillutik ingerlateqqissinnaassallugit. Pinngortitamik ilisimatusarnermut tunngasunik ilinniagaqarsimasut taamaasillutik aamma amerlissapput.

- Pisortaqarfinni atorfiit Nunatsinneersunit annertunerusumik inuttalerneqarsinnaassapput, uuliasiortitseqatigiiffiit, aatsitassarsioqatigiillu ilimagisatsituut Nunatsinniinnerulissappata, taava Nunatsinneersunik annertunerusumik sulisoqalersinnaalissapput, Ilinniartitaanermut naalakkersuisoq Palle Christiansen oqarpoq.

Naak ilinniarneqarsinnaasut nunani allani inissisimassasut Nunatsinnut attuumassuteqarluinnarput.
Pinngortitaleriffimmi professori Søren Rysgaard taama oqarpoq:

- Kalaallit Nunaanni ilinniarnertuujugaanni siunissamilu ilinniarusulluni, taava toqqagassat assigiinngitsut soorunami toqqarneqarsinnaapput, isumaqatigiissulli una periarfissanik nutaanik ammaassivoq.

- Tassami nunanut allanut ilinniariartoqarsinnaagaluartoq, nunani allani ilinniarniakkap iluani fagit ataaasiakkaat Nunatsinni tiguneqarsinnaalissapput, nunagisaq qimannagu, ilaquttallu najorlugit, Pinngortitaleriffimmi professori, Søren Rysgaard, oqarpoq.

Ilisimatuut nuimasut Nunatsinneersut, Canadameersut Danmarkimeersullu 200-t missaat isumaqatigiissutitigut ataqatigiissinneqassapput suleqatigilluarnerulersinneqarlutillu.

Suleqatigiit Nunatsinneersut, Canadameersut Danmarkimeersullu novembarimi tulliani ataatsimeeqatigiissapput.

Issittumi ilinniartitaanermi ilisimatusarnermilu isumaqatigiissut iluaqutigalugu ilinniartitsissutissat ilisimatusaatissallu aalajangersimasut ukiumi atuarfiusussami matumani pilersinneqareersinnaanissaat, Ilinniartitaanermut Naalakkersuisup Palle Christiansenip neriuutigaa.